И мукьвара Зизикрин хуьре шаир Дашдемир Адилован яратмишунрин вечер кьиле фена. Ам КIварчагърин культурадин КIвалин директор Наврузов Зейнуллагьа кьиле тухвана. Дашдемир Адилован уьмуьрдин ва яратмишунрин рекьикай Зизикрин юкьван школадин муаллим Эскендар Эскендарова, адалай гуьгъуьниз НуьцIуьгърин юкьван школада гзаф йисара тарсар гайи, алай вахтунда лайихлу пенсияда авай ва вичиз шаир мукьувай чизвай муаллим Нурдин Мегьамедкеримова хуш келимаяр лагьана. Зизикрин ва НуьцIуьгърин культурадин КIвалерин директорар тир Шихнебиев Шихнебиди, Эскендарова Анахалума, къуллугъчияр тир Селимова Маяди, Мегьамедова Гуьлшеди, тренер Абдуллаев Абдулагъади, хуьруьн юкьван школадин аялри кIватI хьанвайбуруз шаир Дашдемир Адилован чапдай акъатнавай кьуд кIватIалдай, хайи хуьруькай, уьмуьрдикай ва девирдикай шиирар кIелна, манияр лагьана ва кьуьлер авуна.
Зизикрин хуьруьз шаирдин межлисда иштирак авун патал райондин культурадин Дворецдин къуллугъчияр, музыкантар, манидарар, телевиденидин къуллугъчияр атанвай. Абуру межлис мадни гурлу авуна.