Районэгьлийриз ам ЦРБ-дин аялрин хъсан духтур-педиатр яз чида. Амма хайи эдебиятдал рикI алайбуруз ам илгьамдикай пай ганвай шаирни яз чида. Гьеле школада кIелзамаз вичин сифтегьан гьиссер шииррин цIарара тваз алахъиз хьайи адан хейлин шиирар а йисара лезги газетризни акъатнай. Лейлади шиирар, лезги чIалалди хьиз, урус чIалалдини кхьизва. ИкI, Дагъустандин халкьдин шаир Расул Гьамзатован юбилейдихъ галаз алакъалу яз Дагъустандин культурадин министерстводи кьиле тухвай Дагъустандиз талукьарнавай эсерар яратмишунин конкурсда Лейладин шаирвилин бажарагъни къейднай.
Амма Лейла Османовадин шаирвилин бажарагъди цуьк акъудай вахт ада сифтедай чпин хзандин ансамбль яз майдандиз акъатай са шумуд конкурсринни фестивалрин лауреат хьайи машгьур «Мирес» группадин художественный руководитель, вичихъ музыкальный рекьяй кьилин образование авай, хъсан музыкант ва инсан тир вичин уьмуьрдин юлдаш Нариман Фахрудиновичахъ галаз санал и группадин солистар патал манийрин чIалар кхьей йисар я лагьайтIа чун гъалатI жедач. Абурни адахъ и йисара 60 далайни виниз хьанва. Абур халкьди еке хушвилелди кьабулнава. Ахьтинбурун жергедай яз ихьтин машгьур хьанвай манийрин тIварар кьаз жеда: «КIани яр», «Майина», «Бубадиз», «Чарадаз куькIвей чирагъ», «Студентка», «Зи муьгьуьббат», «Зарема», «КIани рикIер», «Чубарук» ва масабур.
«Мирес» группадин илгьамдин чешме, и ширин сес авай манидарни хьиз (халкьдин вилик экъечIзавачтIани), Османова Лейла савадлу духтур, гьакI 4 аялдин мегьрибан дидени я. Абурун чIехи хва Рагьмана алай вахтунда Дагъустандин техуниверситетда кIелзава.
Вичин яратмишунра кьилин чка муьгьуьббатдин лирикади кьаз-ватIани, санлай кьурла, адан шииррин тематика гегьенш, тешпигьар къешенг, рифмаяр девлетлу ва везинлу я.
Лейла Османовадин яратмишунриз уьмуьрдин гьакъикъатдиз мукьвавал, гьиссерин михьивал ва фикиррин деринвал хас я. Ада вичин шиирра гуьрчегвал, пак муьгьуьббат, чи бубайрин милли адетриз вафалу хьуниз, хайи къул ва чIал хуьниз эвер гузва. Ам шииратдин четин рекье вичин жигъир кутаз, вичин гаф лугьуз алахънавай шаир я. Им, гьелбетда, тебрик ийиз жедай кар я.
Шаир дишегьли Лейла Османовадикай куьруь гаф заз ихьтин ибаратралди куьтягьиз кIанзава: Къуй ви илгьамдин булахдай яд садрани кьери тахьурай Лейла вах. Вахъ яратмишунрин рекье мадни еке агалкьунар хьурай!
Агъадихъ чна чи газет кIелзавайбурун фикирдиз адан са шумуд шиир гъизва.