Жува садра хкягъай кеспидай уьмуьрдин макьсад, руьгьдин таъминвал жагъунилай белки инсандиз маса еке бахт авач жеди. Ахьтинбурун жергедай яз вичин вири савадлу уьмуьр чи акьалтзавай несилдиз чирвилер ва тербия гунин четин, амма баркаллу кардиз бахшнавай Асалдхуьруьн тамам тушир юкьван школадин математикадинни физикадин тарсар гузвай муаллим Магьмудов Садикь Балабеговичан тIварни кьаз жеда.
1939-йисуз кесиб лежбер хзанда хана чIехи хьайи жегьил гада, 1957-йисуз Шихидхуьруьн юкьван школа акьалтIарайдалай гуьгъуьниз, вичин хивевай ватандашвилин буржи кьилиз акъудун патал Советрин Армиядин жергейриз къуллугъиз фена. Армиядай хтайдалай гуьгъуьниз ада, гзаф маса жегьилри хьиз, Махачкъалада III-Интернационал тIвар алай фабрикада рабочий яз кIвалахна.
Вичин къастунал кIеви ва аскервилин лигимвал къачунвай жегьил гада 1963-йисуз ДГУ-дин математический факультетдик кIелиз экечIна ва 1968-йисуз анаг хъсан чирвилер аваз акьалтIарна.
Направленидалди Хив райондиз ракъурай ам, ана 3 йисуз кIвалах авурдалай гуьгъуьниз, 1971-йисуз хайиди тир Шихидхуьруьн юкьван школадиз хтана ва 1998-йисалди ана аялриз математикадин тарсар гана. Вич хайи Асалдхуьре тамам тушир юкьван школа ачухарайдалай гуьгъуьниз, пешекарар тахьуниз килигна, ам аниз кIвалахал хтана.
Вичин уьмуьрдин чIехи пай – 41-йис – акьалтзавай несилдиз чирвилер ва тербия гунин четин кардиз бахшнавай ам вичин кьисметдал рази я. Ада тарсар гайибурукай чпикайни къе муаллимар ва маса кеспийрин сагьибар хьана.
1973-йисалай инихъ Асалдхуьруьн ФАП-дин зеведиш яз кIвалахзавай вичин уьмуьрдин юлдаш Амурейгьанахъ галаз санал абуру 4 аял хвена чIехи авуна, абурукай хайи халкьдиз ва Ватандиз вафалу инсанар хкуднава.
ЧIехи руша Лейлади, - дидедин рехъ хкягъуналди, сифте медучилище, гуьгъуьнлайни ДГУ-дин биологический факультет акьалтIарна. Алай вахтунда ада республикадин аялрин центральный инфекционный больницада старший медсестра яз кIвалахзава.
Гада Эдика Дагъустандин сельхозакадемия ва гуьгъуьнлайни заочныйдаказ педуниверситетни куьтягьна, алай вахтунда Махачкъа-ладин гуьзгуьдин чIунарин заводда цехдин начальник яз кIвалахзава.
Рушар тир Герекмаза Дагпедуни-верситет акьалтIарна, алай вахтунда Тюменда муаллим яз кIвалахзава, Дагпедуниверситетдин къецепатан чIаларин факультет куьтягьай Гуьлмира алай вахтунда Москвада аялрин са ясли-бахчада методистка я.
Эвленмиш хьанвай абурухъ виридахъ чпин хзанар, кIвал-югъ, чIехи диде-бубадихъни 17 хтул хьанва.
Абур гатуз каникулрин вахтунда еке ашкъидивди чпин чIехи диде-бубадин патав са кьил чIугваз, ял ягъиз хуькведа. Лежбер хзанда чIехи хьайи ва багъманчивилел гзаф рикI алай Садикь бубади вичин гъилералди кутуна чIехи авунвай багъда, сала гьар сортарин емишар ва майваяр битмишарна, абурал вил алаз жеда.
Алай йис Магьмудоврин хзан патал иллаки лишанлуди хьана. И йикъара 1-категориядин тежрибалу муаллим, адалатлу хзандин кьил ва зегьметкеш Садикь Балабеговича вичин уьмуьрдин 70-гатфар шад гьалара къаршила-мишна.
Вичин вири савадлу уьмуьр аялрин рекьиз, чи гележегдиз бахшнавай С. Б. Магьмудовахъ яргъал уьмуьр, кIвалахда мадни еке агалкьунар ва хтулрикай рикIин архайинвал хьун чи мурад я. Ихьтин адалатлу хзанар чи обществодин диб, мягькем бинеяр я.
