Намусдивди тIуьр фу ширин жеда

- Аквазва заз, уьмуьрда зегьметар гзаф чIугунвайди, гьавиляй намусдив тIуьр фу ширинни жеда лугьузва вуна, тушни? – суал тагана акъвазиз хьанач завай.
- Зи яшара авай инсанриз зегьметдин дад фад чир хьайиди я, хтул, - лугьузва Гь. Гьажимирзоева. – Гила хьиз, кIвалах тавурдаз фу гьатзавай девир тушир. Хзан хуьн патал зегьмет чIугуна кIанзавай. Валлагь, юргъун-галат жезвайтIани, гьа фу ширинни тир, инсанар гьуьрметлу, хатурлуни.
Агъсакъалдихъ галаз атирлу чай хъваз столдихъ ацукьна авур суьгьбетдай малум хьайивал, ам I930-йисуз лежбердин хзанда дидедиз хьана. Хуьре ада 5-классни куьтягьна.
- Дяведин дар ва четин йисар зи рикIелай къени алатзавач, - лугьузва ада – Хасавюртдай зегьметдин фронтдай хтай зи буба начагъвиликди 1949-йисуз рагьметдиз фена. Зун хуьруьн Мукьтадиран тIварунихъ галай колхозда кIвалах авуниз мажбур хьана. РикIел алама: дяведин ва адалай гуьгъуьнин йисара колхозда 200-250 гектарда техилар, 10-20 гектарда келемар, турпар, картуфар цазвай, I00-далай виниз мал-къара хуьзвай. ЧIехибурухъ галаз за гвенарни гвена, векьерни яна, са шумуд йисуз зун данайривни фена.
1954-йисуз Гь. Гьажимирзоев кьадар-кьисметди Туркменистандиз акъудна. Ина ада Челекен, Чарджоу шегьерра нафтIадин мяденра дизелиствиле, бурильщикдин куьмекчивиле кIвалахна.
Хзандин гьалар себеб яз 1962-йисуз Гь. Гьажимирзоев хайи хуьруьз хтана. Ада хуьре сварщиквиле, са шумуд йисуз Северокавказский экспедицияда (Махачкъалада) кIвалахна.
I980-йисуз ам Къазахстандин Шевченко шегьердиз фена, та пенсиядиз экъечIай 1987-йисалди ана буругъра намуслувилелди кIвалахна.
Малум хьайивал, Гь. Гьажимирзоевахъ, лугьудайвал, къизилдин гъилер ава. Ам харат, къванцин устIар, гьатта перемар, костюмар цвадай хъсан дерзичини я. Ада и хуьре, гьакIни къунши хуьрера цIудралди яшайишдин кIвалер эцигна, анрик рак-дакIар кутуна, айванар акална.
- И гъилери тавур кIвалах авайди туш, хтул, -вичин зегьметди лигимарнавай гъилер къалурзава Гьажимирзе халуди. – Я заз са вахтундани зегьметдихъай, четинвилерихъай кичIени хьайиди туш.
Ваъ, ибур кьуру гафар туш. И кардихъ зун ихьтин са кIвалахди инанмишарна. Яшар хьанватIани, Гьажимирзе халу секиндиз кIвале ацукьнавач. Ада, 60 сотых чил къачуна, ана хъсан багъ кутунва. Виликдай сала чIуру емишрин къелемар цана, гуьгъуьнлай абуруз бубайрин емишрин куьгьне сортарин къелемар гана, багъ арадал гъана.
Агъсакъалдин кIвалерихъ галай сала и патара гьелелиг садахъни авачир шефтелиярни, хурмаярни ава. Сала авай тарариз Гьажимирзе халуди ципицIрин тегьенгарни акъуднава, чаз лагьайвал, им пуд лагьай йис я ада ципицIрин бегьер вахчуз.
Гь. Гьажимирзоева сала помидорар, афнияр, газарар, пахлаяр, келемар, хуьрекдик ишлемишзавай гьар жуьре хъчарни гьасилзава, адахъ чIижерин куьнуьярни ава. Эхь, зегьметдал рикI алай кас я Гьажимирзе халу.
Зегьмет вичин уьмуьрдин асул игьтияждай кьунвай Гь. Гьажимирзоевахъ къени, вирида гьуьрметзавай хзанни ава. Адан уьмуьрдин юлдаш Бесмехалума сифтедай колхозда, гуьгъуьнилай 26 йисуз хуьре почтальонвиле кIвалахна. Намуслу зегьметдай адаз «Зегьметдин ветеран», Ватандин ЧIехи дяведин 50 ва 60 йисарин юбилейрин медалар ганва.
Мадни са кар заз якъин хьана. Гьажимирзе ва Бесмехалум Гьажимирзоеврин 4 веледдихъни ачух рикIер, хуьре-кIвале, кIвалахдал чеб тухудай гьунар-хесет ава. ЧIехи гада Ражидин тежрибалу хирург я, ада райондин центральный больницада кIва-лахзава. Таисани духтур я, Герейханован хуьре яшамиш жезва. Назидина Сайтархуьруьн школадин директорвиле, прапорщик тир Альбинади Каспийск шегьерда военный частуна кIвалахзава.
15 хтулди чIехи дидединни бубадин рикIер шадарзава. Гаф кватай чкадал лугьун: абурун чIехи гада Ражидинан хва Эльдарни Москвадин областда военный духтур я.
Аквазвайвал, веледар, хтулар уьмуьрда гьар са карда диде-бубадилай чешне къачуз алахъзава. Алакьни ийизва. Бахтлу хьурай ихьтин инсанар!