Малум тирвал, алай йисуз чи райондин 80 йис тамам хьана. Идаз талукь яз райондин культурадин ва информациядин управлениди виликамаз тухудай мярекатрин ва серенжемрин махсус план туькIуьрна. Адан бинедаллаз кIвалахни тухузва.
Райондин юбилейдиз талукьарна мукьвара Культурадин Дворецда «Чна бажарагълубур жагъурзава» лишандик кваз конкурс-килигун кьиле тухвана. Аниз гзаф хуьрерай гьевескарар атанвай. Жюриди манидарар тир Шерфе Межидовадин, Къурбан Мурадханован (кьведни Зизик), Раижат Жигеровадин (Эминхуьр), кеменчидал лезги авазар тамамарай Абдурашид Ражабован (ДаркIуш-къазмаяр), кфилдай авазар тамамарай Мурад Шерифован (Цмур), Зизикрин Культурадин кIвалин фольклордин коллективдин (ада «Мехъер» тамашадай са сегьне къалурна), Испикрин хордин коллективдин (ада са шумуд мани тамамарна) алакьунриз еке къимет гана.