Эхиримжи гьафтеда массовый информациядин саки вири такьатра еке фикир Дагъустандин Къизляр райондин Краснооктябрское хуьре хьанвай «аламатдин» аялдиз - 9 вацран яшда авай Али Якъубоваз гузва. Адан диде - бейкар, буба - милициядин къуллугъчи, икьван чIавалди амай агьалийрилай са акьван тафаватлу ксар тушир.
Диде-бубади хабар гузвайвал, хайи чIавалай гададин хамунал араб гьарфариз ухшар яру цIарар акъатзава. И гьарфарай кьил акъудун патал диде-бубади чкадин мискIиндин имамдиз эвер ганай. Малум хьайивал, аялдин хамунал акъатзавайбур Мегьамед пайгъамбардин гьадисар ва Къуръандай тир аятар я.
Аялдин диде Мадинадин гафаралди, сифтени-сифте гададин ченедал хайидалай кьулухъ «Аллагь» гаф акъатна. Гуьгъуьнлай бедендин и ва я маса чкайрал Къуръандай тир келимаяр пайда жез башламишна. Абур са шумуд юкъуз амукьзава. Гуьгъуьнлай Мадинади ачухарайвал, хва хайидалай кьулухъ ихьтин кхьинар адан вичин бедендални акъатна. Гафар субутарун патал дишегьлиди вичин «Аллагь» гаф кхьенвай руфунин шикил ядай ихтияр гана.
«Аламатдин» аял ахтармишун патал и йикъара Красно-Октябрское хуьруьз Россиядин муфтийрин Советдин делегация мугьман хьана. Аялдиз килигайдалай кьулухъ Россиядин Исламдин культурный центрадин руководитель Абдул-Вахед Ниязова лагьана: «Кхьинар гъилелди авур гелер аялдин бедендилай чаз жагъанач.
Келимаяр, кхьенвай гафар адал галай-галайвал, яни гьакъикъатдин крарихъ галаз алакъалу яз акъатзавай, гьаниз килигна, им са ни ятIани чIуру ниятдалди авунвай кар тирди чавай садавайни лугьуз жедач».
«Аламатдин аял хунихъ галаз алакъалу дуьшуьшди чи рикIел Алем арадал гъайи кас вуж ятIа хкизва, - лагьана муфтийрин Советдин къенепатан крарин департаментдин руководитель Арслан-Хазрат Садриева. - Дагъустан лагьайтIа, Кеферпатан Кавказда мусурман дин чукIурунин бине кутур чка я. Гьаниз килигна, аквар гьаларай, республика ихьтин аламатдин кар патал хкянава».
Гьа са вахтунда, лагьана кIанда хьи, аялдин ва адан дидедин бедендал акъатзавай кхьинар Аллагьдин патай тирдахъ Россиядин вири мусурманар агъазвач. «Аламатдин аял» секиндаказ кьабулайбурукай сад Москвадин Мемориальный мискIиндин имам Шамил Аляутдинов я. Ада рикIел хкайвал, мусурман диндиз талукь асул аламат - им Къуръан я, рикIе иман авай кас патал идалай артух аламат авач.