Малум тирвал, 1974-йисан 30-октябрдиз Мордовиядин ва Пермдин политический дустагъра авайбуру каш гун малумарна. Гьа и югъ чи уьлкведа политический репрессийрин къурбандар рикIел хуьдай Югъ яз малумарна. Политический репрессийрин къурбандрин къайгъударвал авунин месэладиз чи уьлкведа ва гьакIни чи республикада йисалай-суз артух фикир гузва. Абурун гьакъиндай 2004-йисан 22-августдиз кьабулай РФ-дин «О реабилитации жертв политических репрессий» Федеральный закон ва 2004-йисан 21-декабрдиз Дагъустан Республикадин Халкьдин Собраниди «О социальной поддержке жертв политических репрессий» законар кьабулнава.
Алай вахтунда чи районда гьукуматди тайинарнавай жуьреба-жуьре кьезилвилерикай менфят къачузвай 9245 дахъ агакьна инсанар ава. Абурун жергедай сифте нубатда 17 кас Ватандин ЧIехи дяведин иштиракчияр ва абурухъ галаз сад авунвайбур, зегьметдин, аял чIавалай ва гьакIни умуми начагъвилерикди инвалидар тир 3926 кас, 18 йисалди фидалди яшда авай инвалидар тир аялар 490 ва политический репрессийрин къурбандар хьана реабилитировать хъувунвайбур тир 50 кас ава.
Политический репрессийрин къурбандар хьана реабилитировать хъувунвайбуруз винидихъ тIвар кьунвай законрихъ галаз кьадайвал агъадихъ галай кьезилвилер ава: яшайишдинни коммунальный кьезилвилер (газ, электроэнергия ишлемишунай) гунихъ галаз санал абурун начагъвал сагъар хъувун патал духтуррин рецептрай къачузвай дарманар 50 процентдин кьезилвал аваз гузва; йиса са сеферда ракьун рекьерин транспортда аваз (кьве кьилни) пулсуз, ракьун рехъ авачир чкада целай, гьавадай фидай ва автомобилрин улакьра аваз 50 процентдин кьезилвилер аваз физ жеда; пулсуз телефон эцигда; сагъар хъийидай учрежденидай санаторияда сагъар хъувун чарасуз тирдан гьакъиндай медицинский заключение авайбуруз санаторно-курортный путевкаяр гуда;
государстводин ва муниципальный здравоохраненидин учрежденийра учирда акъваз тавуна медицинадин куьмек гуда.
Реабилитировать авунвай ксариз хьиз абурун хзанризни винидихъ къалурнавай кьезилвилер ава.
Политический репрессийрин къурбандар хьана реабилитировать хъувунвайбуруз гьар вацра 584 манат (ЕДВ) гузва.
Политический репрессийрин къурбандар хьайибур рикIел хкидай юкъуз заз лугьуз кIанзава: рикIериз сабур це. Къуй куьн ва куь балайрин кьилел дуьнья ислягь хьурай, куь кIвалера бахт, берекат артух хьурай.