Алай йисан 11-октябрдиз, чи уьлкведин бязи маса регионра хьиз, Дербент шегьердин мэр хкягъун патални сечкияр кьиле фена, эгер абуруз сечкияр лугьуз жез хьайитIа. Кьиблепатан Дагъустандин меркез яз гьисабзавай къадим Дербент шегьердин мэр хкягъун патал кьиле фейи сечкийра дербентвийрин-агъсакъалрин, са жерге идарайрин ва карханайрин коллективрин тIалабуналди чи «Сулейман-Стальский район» муниципальный райондин Кьил Имам Музамудинович Яралиевани вичин кандидатурани къалурнавай. Амма и кар чи республикадин кьиле авайбуруз бегенмиш хьанач.
ГьикI лагьайтIа, гьукум гъилевайбуруз са вахтундани чпелай савадлу, кар алакьдай, инициатива гвай, авайди чинал акъвазна лугьудай чпин табийвилик квай гьар дережайрин руководителар-къуллугъчияр бегенмиш жедайди туш. Абуруз чпиз табий, «йикь» лагьайтIа, «рекьиз», «къарагъ» лагьайтIа, «къарагъиз» гьазур, «юкь» агъузна акъваздайбур хуш я. Вичи чи республикадин аслу туширвал хуьн патал акьалтIай кьетIенди хьайи 1999-йисуз ва гьакIни адалай виликан ва гуьгъуьнин четин йисара ДР-дин прокурор ва гьа са вахтунда Госсоветдин член яз кIвалах авур И. М. Яралиеван лайихлувилер гьукуматдин са шумуд наградайралди къейд авунайтIани, Муху Гимбатович Алиева вичикай ДР-дин Президент хьайи са тIимил вахтундилай вичин шахри гъаразвилер себеб яз, са себебни авачиз ам ДР-дин прокурорвилин везифайрикай къерех авуна.
Эхь, за винидихъ къейд авурвал, чIехи руководителриз халкьдин гегьенш къатара гьуьрмет ва авторитет авай савадлу инсанар хуш жедайди туш. Гьавиляй и «сечкийрани» Дагъустандин руководстводи вичин вири силовой структураяр желб авуналди и сечкийра И. М. Яралиев гъалиб тахьун патал законриз акси вири серенжемар кьабулна, чпиз табий Дербент шегьердин виликан мэр Феликс Къазиагьмедован кресло хуьн патал, векъи къуват ишлемишуналди, кьацIай технологияр кардик кутуналди, и сечкияр адалатсузвилин чешнедиз элкъуьрна. Сечкийрин юкъуз сечкидин 36 участокдикай 16 участок асул гьисабдалди (И. М. Яралиеваз майилвал ийизвай сечкияр авай) ахъайиз тун тавуналди, сечкийрин гьакъиндай Закондин истемишунар векъидаказ чIурна ва РФ-динни ДР-дин Конституцийра тайинарнавай ватандашрин азадвилериз, ихтиярриз векъидаказ кIур гана.
Векъи къуват, гуьлле алай яракь ишлемишуналди, къайдасузвилер яратмишуналди, гзаф миллетар са хзанда яшамиш жезвай Дербент шегьердин агьалияр къурхулувилик кутуна, чпин хсуси интересар хуьн патал кьиле тухвай и сечкийри ислягь ва зегьметкеш халкь тир дербентвийрин ва гьакIни негь авуниз лайихлу и вакъиадин шагьидар хьайибурун гуьгьуьлар кIевелай хана.
И къайдасузвилерин гьакъиндай гзаф кьадар субутдай делилар, арзаяр, суддин къарарар авайтIани, бубайрин мисалда лугьудайвал, гъили-гъил чуьхуьда лагьайвал, законар хуьдай вини дережадин органри, я чIехи регьберри и жигьетдай кар кьетIдай, адалат, къанун гъалиб жедай са серенжемни кьабулнач. Правовой государство тешкилиз кIанзавай чи уьлкве патал Дербентда ва гьакIни Россиядин маса регионра кьиле фейи и сечкийра, милли месэлайриз ва гьакIни сечкийрин ихтиярар, азадвилер хуьниз талукь законрин истемишунар рейд авуналди, вич парламентский партия яз малумарнавай «Сад тир Россия» партиядин ва адан лидерри чпин гьакъикъи чин къалурна.И къайдасузвилериз акси яз гзаф чкайра сечкийрин наразивилин митингар кьиле физва. ИкI, и йикъара, 26-октябрдиз, халкьдин наразивилин митинг чи уьлкведин меркез тир Москвада Красная Пресня куьчеда авай Краснопресненский заставадин майдандални кьиле фена.
И сечкияр кьиле фейи гьалдин гьакъиндай делилламишнавай гзаф макъалаяр центральный ва аслу тушир газетризни акъатзава.
Чна гьахъ гъалиб жедайдахъ инанмишвал квадарзавач.
