Герейханово хуьруьн юкьван школа дерин чирвилер аваз куьтягьай Велибегов Сейфедин Дагъустандин хуьруьн майишатдин институтдин ветеринарный факультетдик экечIзава. Ина виниз тир стипендия къачуз кIелай жегьилди институт яру диплом къачуналди акьалтIарзава.
Пешекарар герек чкайриз махсус направленидалди рекье твазвай йисар тир. Ингье жегьил пешекар Къизляр райондин «Красный Восход» тIвар алай колхоздиз ветеринарный духтурвилиз рекье твазва. Са тIимил вахтунда кIвалах авурдалай гуьгъуьниз адаз Советрин Армиядин жергейриз эвер гузва. Ада Советрин кьушунрин дестедик кваз Германияда чешнелудаказ къуллугъ ийизва. Идан гьакъиндай ам хайи диде-бубадиз ва ада кIелай школадиз военный частунин командиррилай хтай чухсагъулдин чарари шагьидвал ийизва.
1979-йисан август. Махачкъалада авай хуьруьн майишатдин техникумдиз пешекар-педагогар бес жезвачир. Ингье Сейфедин Алиуллаевичаз гьаниз кIвалахал теклифзава. Са куьруь вахтунда ада техникумда кIелзавайбурун ва преподавателрин арада еке гьуьрмет ва авторитет къазанмишна. Гьа икI, вад-ругуд йисан вахтунда техникумда гьакъисагъвилелди зегьмет чIугуна, кIелзавайбуруз дерин чирвилер ва тербия гана. Гьа ина кIвалахдай йисара ада, кеспидивай къерех тахьана, Москвадин К.И.Скрябинан тIварунихъ галай ветеринарный академиядин педагогвилин факультетни акьалтIарна.
Шегьерда кьиле физвай политикадихъ галаз алакъалу мярекатра активвилелди иштирак ийизва. Ам анрал рахазва, цIийи фикирар лугьузва. Ада вичи лугьузвайвал, адан рикIни хайи халкьдихъ кузва. Ингье адаз 1995-йисуз Дагъустан Республикадин милли политикадин, информациядин ва къецепатан алакъайрин министерстводиз кIвалахал теклифзава. Ина милли политикадин управленидин кьилин пешекар яз кеспидив эгечIай ам куьруь са вахтунда кардин гъавурда гьатзава.
Диндин крарай Дагъустан Республикадин виликрай чукIурай комитет арадал хкунихъ ва министерстводин аппаратдин отделрин кьадар тIимиларунихъ галаз алакъалу яз, министерствода дегишвилер турдалай гуьгъуьниз, яни 2008-йисан январдилай инихъ Сейфедин Алиуллаевича политический партийрихъ ва Общественный объединенийрихъ галаз кIвалах тухудай отделдин начальникдин заместителвилин, гьакъикъатда гьа и йикъалай инихъ, ада отделдин начальникдин везифаяр тамамарзава.
- Ингье, чи ватанэгьлиди кIвалахзавай министерстводин министрди адан гьакъиндай Дагъустандин Президент М. Г. Алиеваз кхьей тIалабдин чарче вуч лугьузватIа: «Гьуьрметлу Муху Гимбатович, чаз вуна РД-дин милли политикадин, информациядин ва къецепатан алакъайрин министерстводин отделдин начальникдин везифаяр тамамарзавай Велибегов Сейфедин Алиуллаевичаз - РД-дин Госкъуллугъдин 3-классдин советникдиз- Дагъустан Республикадин государственный къуллугъдин лайихлу работниквилин» тIвар гунин гьакъиндай чна ийизвай тIалабунин тереф хвена кIанзава. Ада чи министерствода 1995-йисан 1-мартдилай кIвалах-зава. С. Велибегов милли политикадин ва миллетрин алакъайрин рекьяй савадлу пешекар я. Халкьдин дипломатиядин рекьяй авай чирвилерикай кар чиз менфят къачуналди, миллетрин гзаф фикиррин чаравиликай, гьуьжетрикай лап къенепатай хабар аваз, вичин кIватI хьанвай тежрибадикай ва чирвилерикай, виниз тир пешекарвиликай ва къенепатан культурадикай менфят къачуналди, адалай министерстводин вилик акъвазнавай месэлаяр гьялунин карда тIимил хийир гуз алакьнавач. Ам республикадин гьуьжетар ва акьунар авай чкайра са шумуд сеферда хьана, гьахьтин гьуьжетар алай месэлаяр гьялун патал республикадилай къеце чи ватанэгьлияр яшамиш жезвай чкайризни фена. Отделдин начальник тир вахтунда республикадин властдин органра гьикьван гьи миллетри кIвалахзаватIа чирунин кардик кьил кутурдини гьам я. ГьакI муниципальный тешкилатра и жигьетдай авай гьаларин гьакъиндай делилар чирна, РД-дин Гьукуматдиз справка кхьена. Абурукай республикадин, Хатасузвилин Советдин руководителри чпин рахунра менфят къачуна. Ада алатай йисуз Дагъустан Республикадин Президентдин грантар тайинардайла еке кIвалах тухвана. И жигьетдай министерстводин конкурсдин комиссиядин председателдин заместитель яз ада конкурсдин документрин еридал вичи гуьзчивал тухвана. Гзаф сеферра телефонрай, министерствода кьабулуналди, конкурсдин документар гьазурун патал куьмекар гунилай гъейри, С. Велибегова «Дагъустан» РГВК-дин передачайра, Дагъустан Республикадин Общественный палатади тешкилай «элкъвей столрин» кIвалахдани иштиракна. Яргъал йисара бегьерлудаказ авур кIвалах, министерстводин вилик акъвазнавай месэлаяр гьялуник кутазвай лайихлу пай фикирда кьуна, тIалабда чи тереф хуьн. Министр Гь. КЪУРБАНОВ».
РФ-дин Пенсийрин фондунин Дагъустандин отделенида отделдин начальниквиле кIвалахзавай Салигьат Рамазановнади Сейфединаз кьве велед - рушни гада багъишна. Диде-бубадин рикI тIар тавуна, шегьредал экъечIнавай Диляради Дагмедакадемия агалкьунралди акьалтIарна, С. Федерован тIварунихъ галай «Микрохирургия глаза» МНТК-дин Калугада авай филиалда офтальмолог (вилерин духтур) яз кIвалахзава. Гьа са вахтунда, кеспидивай къерех тахьана, Москвада аспирантурадани кIелзава. Дахдин тIвар эхцигнавай Алиуллагьани ДГТУ акьалтIарна, Пенсийрин фондунин Махачкъала шегьердин Ленинский райондин управленида кIвалахзава. Бубадинни бадедин гуьгьуьлар куркIвач хьтин хтул руша мадни шадарзава. Къуй куь шадвилерин кьадар мадни артух хьурай, играмибур!
