И йикъара райондин центральный библиотекадин кIелдайбурун залда райондин 80 йис тамам хьунин юбилейдиз талукьарна гъвечIи классра кIелзавай аялрин утренник кьиле фена. Аниз зегьметдин ветеранриз ва гьакIни райондин яратмишдай интеллигенциядин векилриз теклифнавай.
И мярекат кьиле тухузвайди тир аялрин библиотекадин зеведиш Загьирова Тамума чи район арадал атуникай, адан тарихдин рекьикай куьруь суьгьбет авурдалай гуьгъуьниз гаф муаллим Агъарагьимова Фазинадиз гана. Ада чи хуьрерикай, чи баркаллу рухвайрикай ва рушарикай гегьенш суьгьбет авуна. Ахпа гаф зегьметдин ветеран, кьасумхуьруьнвийрин арада еке гьуьрмет авай агъсакъал Керимов Велимет Керимовичаз гана. Вичин уьмуьрдин ва зегьметдин рекьикай куьруь суьгьбет авурдалай гуьгъуьниз ада аялриз чи гележегдин сагьибдарар хьун патал хайи Ватан, зегьмет кIан хьуниз, чи бубайрин баркаллу крариз, адетриз вафалу хьуниз эвер гана.
Гуьгъуьнлай анал чпин куьруь гафар, хайи райондиз, адан центр тир Кьасумхуьруьз бахшна кхьенвай чпин шиирар гваз шаирар тир зегьметдин ветеран Зумрият Жабраилова ва райондин «Куьредин хабарар» газетдин культурадин отделдин зеведиш Абидин Камилов рахана.
Абурун рахунрилай гуьгъуьниз Кьасумхуьруьн 1-нумрадин юкьван школадин гъвечIи классра кIелзавай рушари ва гадайри чи шаирри хайи Ватандиз, лезги халкьдиз, чи райондиз, баркаллу рухвайризни рушариз бахшна кхьенвай шиирар хуралай кIелна.
Аялри анал гьакI чи райондин тарихдиз талукьарна гьазурнавай викторинадин хейлин суалризни тамам жавабар вахкана.
Эхирдай анал тафаватлу хьайи аялриз гъвечIи пишкешар гана.