ДГУ-дин филологиядин факультетдин библиотечный отделение акьалтIарай Людмила Мегьамедрасуловади I985-йисалай инихъ райондин центральный библиотечный системадин (ЦБС-дин) директорвиле кIвалахзава. И йисара анаг агьалийрин рикI алай макандиз элкъвенва лагьайтIа, бажагьат чун ягъалмиш жеда.
Л. Мегьамедрасуловади чаз лагьайвал, ЦБС аялрин библиотекадикай, жаванрин, методикадин, кIелзавайбуруз къуллугъзавай, библиотека ктабралди таъминарзавай отделрикай ва кIелзавайбурун залдикай ибарат я.
Чаз акурвал, культурадин маканда аквадай агитациядин такьатриз кьилин фикир ганва. Цларал алай «2009-йисан юбилярар», «Дагъустан – зи дамах ва кIанивал», «Ктабрин алемда», «Халкьдин зурба ва эбеди гъалибвал», «Чи машгьур ватанэгьлияр» стендри, гьакIни СтIал Сулейманан 140, Эфенди Капиеван 100 ва Байрам Селимован 80 йисарин юбилейриз талукьарнавай, «Халкьдин медицина» ва ктабрин маса выставкайри иниз къвезвайбурун фикир чпел желбзава.
КIелзавайбурун залда столрал гзаф кьадар газетрин ва журналрин, гьабурукай яз «Лезги газет», «Куьредин хабарар», «Дагъустандин правда», «Новое дело» газетрин подщивкаяр ала. Абурукай агьалийри менфят къач узва.
Бажарагълу, пешедал рикI алай культработник тир Людмила Агъафендиевнади ЦБС-да мукьвал-мукьвал тIвар-ван авай писателрихъ, шаиррихъ галаз гуьруьшмиш хьунар, вечерар, кIелзавайбурун конференцияр ва маса мярекатарни кьиле тухузва.