Хуьрерин мухбирриз гьахълудаказ газетдин даяхар лугьузва. Абуру редакциядиз ракъурзавай чпин чарара хуьрера жезвай цIийивилерикай, карханайра кьиле тухузвай кIвалахрикай кхьизва. Зегьметчи инсанрикай кхьенвай материалрини редакциядин почтада еке чка кьазва. Къенин обзорда чаз абурукай са шумудал куьрелди акъвазиз кIанзава.
- Дербентдин хуьруьн майишатдин техникум акьалтIарайдалай гуьгъуьниз Дадашев Салигьа «Ашагастальский» ЗАО-да къелемчивилин бригададин бригадирвиле кIвалахиз 30 йисалай виниз я, - лугьуз кхьизва газетдин штатдик квачир корреспондент В. Жамалдинова. – Адан бригадади гьар йисуз агъзурралди чуьхверин, ичин, пIинидин ва маса емишрин къелемар гьасилзава. Зегьметда къазанмишнавай агалкьунриз килигна, мукьвара С. Дадашеваз РФ-дин хуьруьн майишатдин министерстводин Гьуьрметдин грамота гана.
С. Дадашеван кIвалахдилай карханадин руководстводи разивални ийизва.
- Хуьруьн чкада механизаторвал виридалайни герек къвезвай пешейрикай сад я, - кхьизва Гь. Кьасумова. – Белки гьавиляй «Аламишинский» ГУП-дин механизатор Керимханов Керимхана и пеше хкяна жеди. Гьа йикъалай инихъ 28 йис алатнава. Вичив гвай «МТЗ-82» маркадин трактордалди К. Керимханова карханада жуьреба-жуьре кIвалахар тамамарзава. Кьилди къачуртIа, алай йисуз ада 70 гектардин уьзуьмлухриз азаррин ва зиянкар гьашаратрин аксина дарманар яна, 50 гектарда жергейрин араяр цана, 30 гектардиз культивация яна.
Курхуьрелай тир РФ-дин журналистрин Союздин член Р. Набиев чи газетдихъ галаз фадлай сих алакъа хуьзвай мухбиррикай сад я.
- Зул чуьлдин кIвалахрин къизгъин вахт я, - кхьизва Р. Набиева. – Алай йисуз Курхуьруьн, Сийидрин, Алкьвадрин ва маса хуьрерин агьалийри чпин салара ичерин, чуьхверрин, жумарин ва маса емишрин хъсан бегьерар битмишарнава. И йикъара абур емишар кIватI хъувунал машгъул я.
Р. Набиева кьвед лагьай чарче Курхуьрелай тир арендатор Шайдаев Сефербеган, чи штатдик квачир корр. З. Наврузова кIварчагъви зегьметдин ветеран, уьзуьмчи-арендатор Мегьамедов Абдулагьан, Чуьхверхуьрелай А. Абасмирзоева «Зардиянский» МУСП-дин рабочий Исмаилов Агьмедан дурумлу зегьметдикай хуш келимаяр кхьизва.
Хуьрерин мухбиррин чарарай аквазвайвал, гьалтзавай четинвилеризни килиг тавуна, гзаф коллективри, инсанри кIвалахзава, гьар са югъ зегьметдалди гуьрчегариз алахъзава.
Рехъ физвай касди атIуда лагьайвал, гьина кIвалахзаватIа, гьана хъсан нетижаярни арадал къведа.