Адет яз гьар са хуьре, гьар са районда вирида гьуьрметзавай инсанар, хзанар жеда. Герейханован хуьре яшамиш жезвай Исакьова Рабиятан хзанни гьахьтинбурукай сад я.
Исакьова Рабият Рамазановна 1936-йисан 15-июндиз Мегьарамдхуьруьн райондин Филерин хуьре дидедиз хьана. Хуьруьн школа акьалтIарай ада 1956-1959-йисара Дербентдин хуьруьн майишатдин техникум акьалтIарна, агроном-плодоовощеводвилин пеше къачуна. Техникум куьтягьай жегьил пешекарди вичин зегьметдин рехъ 1960-йисуз Герейханован тIварунихъ галай совхозда багъманчивилин бригададин бригадирвилелай башламишна. И везифаяр ада 1992-йисалди гьакъисагъвилелди кьилиз акъудна. Совхоз гьа йисара виридалайни чIехи ва девлетлу майишат тир. Майишатдихъ авай багълар кьуьзуь хьанвай, къачузвай бегьер тIимил тир, абур цIийи, хъсан бегьер гудай багълар кутуналди эвезна кIанзавай. И кардиз совхоздин кьиле авайбуру кьетIен фикирни гузвай. Гьар йисуз 50-60 гектарда цIийи багълар кутазвай.
Вахт-вахтунда агротехникади кIанарзавай серенжемар тухвана, хъсан гелкъуьн тешкилна, миянардай шейэр вегьена. Нетижада цIийиз кутур багълар фад арадал атана, багъларин бегьерлувал артух хьана. А йисара майишатди санлай 4 агъзур тонн емишар гьасилзавай. Гьелбетда, аник Рабият Рамазановнадин зегьметдин пайни квай. Майишат Дагъустан Республикадин Гьуьрметдин доскада авай. Гзаф йисара Дагъустандин партиядин обкомдин гъиляй-гъилиз къведай Яру пайдах гуниз лайихлу хьанай.
Намуслу зегьметди Р. Исакьова неинки са чи районда, Дагъустанда, гьакI вири уьлкведа машгьурна. Ам 1961-йисалай 1987-йисалди Герейханован хуьруьн Советдин депутатвиле, 1962-1966-йисара СССР-дин Верховный Советдин депутатвиле, 1966-йисуз ВЛКСМ-дин XV-съезддин делегатвиле, 1965-1976-йисара партиядин райкомдин членвиле, 1971-йисуз Дагъустандин партиядин обкомдин членвиле, 1974-йисуз партиядин райкомдин бюродин членвиле хкяна.
1970-йисуз Р. Исакьовадиз «За доблестный труд» медаль, 1972-йисуз «Знак почета» орден гана. Ам гзаф кьадарда Гьуьрметдин тIварар, грамотаяр, пулдин пишкешар гуниз лайихлу хьана. Алай вахтундани Р. Исакьовади жегьилар зегьметдал рикI алаз вердишарун патал насигьатар гузва.
ТIебиатдин къанунар я – веледар ширин жеда. Абур уьмуьрдин шегьредал багърийриз дарихвал тагана экъечIайла, хайибурун рикI динж жеда, хзанда шадвал гьатда. Ингье Рабият халади вичин уьмуьр-дин юлдаш Музафер галаз хзанда 2 гадани 4 руш тербияламишна, четин-вилер акьалтнатIани, уьзуьягъ яз уьмуьрдин шегьредал акъудна. Абуру гьар сада вичин чка кьунва. Абурухъ хтулар ава.
Эхь Рабият Рамазановна Исакьова намуслу зегьметди машгьурна. И кардал ада дамахни ийизва.