28-сентябрдиз муниципальный райондин администрациядин нубатдин заседание хьана. Адан кIвалахда администрациядин управленийрин, отделрин, организацийрин руководителри, хуьрерин поселенийрин кьилери, теклифнавай маса юлдашри иштиракна.
Заседанидал алай месэлайрикай лугьуналди, ам муниципальный райондин администрациядин Кьил Штибег Гьажимегьамедович Мегьамедханова ачухна ва кьиле тухвана.
Заседанидал алай сад лагьай месэладай – «Районда хуьруьн майишатдин продукция кIватI хъийизвай ва къведай йисан бегьердин бине кутун патал райондин карханайра, лежбервилин майишатра, арендаторрин участокра зулун магьсулрин тумар цунин кIвалахар кьиле физвай гьалдин гьакъиндай» информация райондин администрациядин кьилин 1-заместитель М. Гь. Агьмедова авуна. Ада къейд авурвал, зул алукьуни хуьруьн майишатдин карханайрин зегьметчийрин къайгъуяр артухарнава. Эвелимжи везифайрикай сад агакьнавай емишрин, ципицIрин бегьер кIватIна акьалтIаруникай ва никIера зулун магьсулрин тумар цуникай ибарат я. ЦипицIар кIватIна акьалтIарнава. И рекьяй уьзуьмлухрин гьар са гектардай 130-140 центнер ципицIар кIватI хъувур «Зардиян» ООО-дихъ, ЦIийи Макьарин «Зардиян» участокда авай арендаторрихъ, вичин кIвачихъ галай 3 гектардай 45 тонн бегьер вахчур Эминхуьряй тир арендатор А. Алагьвердиевахъ хъсан нетижаяр хьана.
Алай вахтунда емишар кIватI хъувун давам жезва. Санлай къачурла, карханайри ва агьалийри пис бегьер битмишарнавач. Бязи арендаторри, лежбервилин майишатри багъларин гьар са гектардай I50-200 центнер бегьер вахчузва.
М. Гь. Агьмедова къейд авурвал, райондин экономикада магьсулдарвили еке чка кьазва. Алай йисуз «Надежда» ЛПХ-ди, «Зардиян» ООО-ди никIерин гьар са гектардай, талукь тирвал, 35-40 центнер техил кIватI хъувуна.
Гад агудунин кардик районда тешкилнавай МТС-ди еке пай кутуна.
Гьа са вахтунда, бязи карханайри техил вара-зара хьуниз рехъ гана. Абурукай сад тир «ДаркIуш» ОАО-ди гад агудунин кIвалахар яргъал вегьена, са бязи багьнайралди хейлин гектаррай техил ерли кIватI хъувунач.
Гила хуьруьн майишатдин карханайрин, лежбервилин майишатрин, арендаторрин вилик акъвазнавай кьилин везифайрикай сад магьсулрин тумар цун я. И рекьяй Курхуьруьн зонада гьалар хъсан ятIани, санлай районда кIвалахдин еришар агъузбур я. «ДТ-75» маркайрин тракторар тахьун себеб яз, гзаф карханайра бес кьадар чил цанвач, тумарни чкадал хкана гьазурнавач. Гуьнепатан хуьрера (Шихидхуьр, Зугьрабхуьр, Сайтархуьр...) магьсулрин тумар цуниз ерли фикир гузвач лагьайтIани жеда.
- Санлай районда виликан йисарилай тIимил тушиз, гьич тахьайтIа, 2000 гектардилай виниз майданра техилар цун лазим я, - лагьана М. Гь. Агьмедова.
Докладчиди къейд авурвал, районда ичер ва маса емишар, ципицIар кьабулдай ва гьялдай заводар, цехар авач. Ида гьасилай хейлин бегьер пуч хьунал гъизва.
Райондин сергьятда авай, хуьруьн майишатдин карханаяр, агьалияр дигидай целди таъминарун лазим тир къубуяр ремонт авунин кIвалахрин еришарни йигинарун лазим я.
Заседанидал гьялзавай месэладай анал чпин фикирар УОС-дин начальник А. Жабраилова, райондин архитектор А. Гьуьсейнова, райондин администрациядин кьилин заместитель – администрациядин экономикадин управленидин начальник Р. Муталибова лагьана.
Заседанидал и месэладай талукь къарар кьабулна. Кьвед лагьай месэладай – «Районда яшайишдин зир-зибил тергдай ва кьенвай малар кучукдай чкаяр (скотомогильникар) эцигунин рекьяй тухузвай кIвалахрин гьакъиндай» заседанидал райондин ветеринарный управленидин начальник Н. Абдулкъафарова информация авуна.
Заседанидал райондин образованидин учрежденийра хъуьтIуьн варцара кIвалах авуниз аквазвай гьазурвилерин, КIварчагъ дере хъвадай ва дигидай целди таъминарун патал тухузвай кIвалахрин, райондин центральный больницадиз лицензия къачунин патахъай вилик акъвазнавай ва маса месэлайризни килигна.
Муниципальный райондин администрациядин Кьил Ш. Гь. Мегьамедханов заседанидал гьялзавай гьар са месэладал гегьеншдиз акъвазна, абурун важиблувал къейдна, гьа месэлайрин патахъай вичин фикирар лагьана, гьялзавай месэлайрай кIвалахар хъсанардай меслятар къалурна, теклифар гана.
