Са тIалабчидиз Гьазрет Алидивай пул кIан хьана. Ада вичин рухвайрикай садаз лагьана: «Фена дидедивай за вичив вахкай 6 диргьемдикай сад къачуна иниз гъваш». Ракъурайди пул гвачиз хтана ва ада дидеди а пул гъуьр къачун патал чара авунвайди лагьана. ТIалабчи вичин гъилиз умудлудаказ килигиз акур Гьазрет Алиди вичин буйругъ тикрар хъувуна. И сеферда Гьазретав ФатIимата пул вири вугана. Гьазрет Алиди гьа пул вири тIалабчидиз гана. Са тIимил вахт арадай фейила адан патав деве маса гудай са кас акъатна. Ада вичи 140 диргьемдихъ ам маса гуда лагьана.
- Пул ахпа вахкунин икьрардалди деве заз гудани? - хабар кьуна Гьазрет Алиди. А кас рази хьана, деве маса гана хъфена. Са кьадар вахт ара¬дай фейила, маса касди деве нинди я лагьана хабар кьуна. Гьазрет Алиди деве вичинди я лагьана. А касди 200 диргь¬емдихъ деве вичиз гун тIалабна. Гьазрет Али рази хьана. Деве 200 диргьемдихъ маса гана. 140 диргьем деведин эвелан иесидив вахкана, кIвализ хъфена 60 диргьем Гьаз¬рета ФатIиматав вахкана. Ада гьейран вилералди и кардин себеб хабар кьурла, Гьазрет Алиди ихьтин жаваб гана: «Аллагьдин Пайгъамбарди лагьайвал, гьи касди Аллагь¬дин рекье хийирдин са кар авуртIа, адан эвездай 10 хийир гун хъийида».
Исламдин кьуд зурба имамрикай сад тир Абу Гьанифадиз (Туьрквери адаз имам Аъзами лугьуда) са девлетлуда кIелзавай сухтаярни галаз вацIун къерехдал алай бахчада авай вичин кIвализ теклифна. Имам Аъзамиди теклиф кьабулна ва вичин сухтайриз «За вуч авуртIа, куьнени гьа кар ийида» - лагьана тагькимарна, девлетлудан кIвализ рекье гьатна.
КIвалин иесиди хуьрек тIуьн теклиф авурла, имам Аъзами эвел гъилер чуьхуьн патал вацIал фена. Сухтаярни, имамди тапшуругъ гайивал, гьадан гуьгъуьналлаз гъилер чуьхуьз фена. Абуру вацIал са тIимил энгеларни авуна. Элкъвена хтайла, абуруз гьа чпиз гуз гьазурнавай хуьрекдикай тIуьр кац гьасятда кьейиди акуна. Гьа икI, абуруз а касдин метлеб чеб зегьерламиш авун тирди тестикь хьана ва абуруз фу недалди вилик гъилер чуьхуьник гьихьтин аламат ва хийир кватIа чир хьана.
И гьал акур кIвалин иеси вичи авур кардал пашман хьана. Ада Ислам дин кьабулна, мусурман хьана.