И йикъара Кьасумхуьруьн медресада Къуръан кIелунай конкурс кьиле тухвана. Ана райондин хуьрерай атанвай 30-дав агакьна диндиз майилвал ийизвай инсанри иштиракна.
Райондин имамрин Советдин председатель Шамсудин гьажи Абдулмуталибов, райондин имам Рамазан Рустамов, хуьрерин мискIинрин имамар, маса динэгьлияр квай жюриди Къуръан кIелунай ва адан сураяр хуралай лугьунай конкурсдин иштиракчийрин чирвилерин дережа ахтармишна.
Конкурсда 14 йисал къведалди яшара авайбурун арада 1-чка Р. Ибрагьимова (Герейханован хуьруьн 2-отделение), 2-чка А. Алимова (Чуьхверхуьр), 3-чка Р. Фазилова (Герейханован хуьруьн 1-отделение), яшар хьанвайбурун арада 1,2 ва 3-чкаяр, талукь тирвал, И. Мирзабегова (ЦIийи поселок), Р. Гьасанова (Кьулан СтIал) ва А. Меликова (Кьасумхуьр) кьуна.
Конкурсда 1-чкаяр кьурбуруз рангунин телевизорар, амай приздин чкаяр кьурбуруз къиметлу пишкешар гана.
Пишкешар яз Къуръанар, Каабедин, пак маса чкайрин шикилар алай чIехи плакатар конкурсдин амай иштиракчийризни гана.
Эхирдай Герейханован хуьруьн мискIиндин имам Магьарам гьажиди илгьам хуралай кIелна.
Конкурсдин нетижаяр кьун яз рахай Шамсудин гьажи Абдулмуталибова Къуръан кIелунай районда конкурс сифте яз тухузвайдакай лагьана, гзафбурухъ диндин рекьяй хъсан чирвилер авайди къейдна, и рекьерай ада жегьилриз къиметлу меслятар къалурна, теклифар гана.