Гьуьрметлу редакция! Бубайрин мисалда лагьайвал, ишехь тавур аялдиз нек гудайди туш. Чунни гила ишехьуниз мажбур жезва.
И эхиримжи вад-ругуд йисан вахтунда халкьариз ганвай ва я кирида вуганвай чилера битмишарай емишар кьабулдай чкаяр тахьуниз килигна, бегьер гузвай тарар атIуниз мажбур жезва...
ИкI, 2008 ва 2009- йисара ири цил авай емишар кьабулдай чкаяр тахьуниз килигна гзаф бегьер вара-зара хьана.
Кьасумхуьруьн консервиярдай заводди йисан къене 20-25 агъзур тонн емишар гьялзавайди тир. Акъудзавай продукцияни неинки Советрин Союздин гзаф шегьерриз, гьакI къецепатан гьукуматризни рекье твазвайди тир. Жедачни райондин хуьруьн майишатдин управленидивай республикадин руководстводиз и кардин патахъай арза-ферзе авуртIа?
Дагъустандин дагълух районра авай заводри акъваз тавуна продукция гьялзава ва халкьди зегьмет чIугуна гьасил ийизвай продукция кьабулна халкьдиз пул жезва, бес чун гьибурукай хьурай.
Исятда гзаф хуьрера ва кьилдин ксари битмишарай ичер кьабулдай чка авачиз амукьнава.
ТIалабда и кардин патахъай са серенжем кьабулин, эвел Аллагь рази жеда, ахпа халкьар.
Кьасумхуьруьн агьалийрин патай кхьейди Мегьамеднасир-гьажи НЕЖВЕДИЛОВ я.