Сулейман-Стальский райондин гимн

Кьасумхуьр, са район я вун виридлай гуьзел,
ЧIехи шаир Сулейманан машгьур я тIварцIел.
Къуни-къунши агудзавай ава вахъ муькъвер,
Мел-мехъерик фин паталди шад, шегьре рекьер.

                             Тикрарбенд:
               Чи Кьасумхуьр, чи Кьасумхуьр,
               Чаз багьа ватан,
               Къастаралди я мягькембур
               Ви жегьил-жаван.
               Ви дережа кьакьанди я,
               Мадни хьуй кьакьан.
              КIанда чаз вун, чи сад лагьай
               Район баркаван.

Тавханайра, гьакI куьчейра нур алатна физ,
Къаз фонарри экв гузава юкъузни йифиз.
Югъ-къандивай акваз-акваз жезва вун жегьил,
Ислягьвилин са хизан я, кьуна физвай гъил.

Кьасумхуьр, чаз ажеб багьа я ви Рычал яд,
Ачух жеда хъвайи касдин нахуш кефи фад.
Машгьур я ам мукьвал-яргъал уьлквейрани кваз,
Мярекатрин абур я вич, хуш тушни ам хъваз!

Дагъдин лекьер я рухваяр, къалурдай гьунар,
Вахъ дидеяр, рушар ава цуьквериз ухшар,
Гьисабзава эллери вун - шадвилин макан,
Чи Кьасумхуьр, кIанда чаз вун, чи рикI-жигер кьван.