Райондин 80 йисан юбилейдин вилик и девирда ам фейи баркаллу рехъ веревирд ийидайла кIанзни-такIанз, рикIел адан ад хкажуник чпин пайни кутур кьилдин регьберрин, производстводин кIвенкIвечийрин тIварар хуьквезва.
Ихьтин, вич зегьметда машгьур авур, вичин вири савадлу уьмуьр хайи халкьдиз, партиядин рекьиз бахш авур, райондин экономика вилик тухуник вичин зегьметдин пайни кутурбурун жергедай яз бине Кьасумхуьрелай тир партиядин ва зегьметдин ветеран Керимов Велимет Керимовичан тIварни еке гьуьрметдивди кьаз жеда.
Ам 1936-йисуз Кьасумхуьрел хана. ГъвечIи чIавалай техникадал рикI алай, Кьасумхуьруьн 1-нумрадин юкьван школадин 9-классда кIелзавай вахтунда ам райвоенкоматдай шофервилин пешекарвал къачун патал автошколада кIелиз 6 вацран курсариз рекье туна. Анаг агалкьунар аваз акьалтIарай жегьил гада вичин хивевай ватандашвилин буржи кьилиз акъудун патал Советрин Армиядин жергейриз къуллугъиз фена. Белоруссияда къуллугъ авур адакай ана саперрин батальондин, гуьгъуьнилайни частунин командирдин шофер хьана.
Зегьметдин биография В. К. Керимова 1952-йисуз Кьасумхуьруьн консервиярдай заводда рабочийвилелай башламишна. Вичи хкягъай пешедай руьгьдин таъминвал жагъай ада I955-йисалай, гьар чкайра жуьреба-жуьре маркайрин автомашинрал кIвалахна. 1959-1964-йисара адакай Махачкъала шегьерда якIунни некIедин промышленностдин управленидин 6-нумрадин АТК-дин шофер хьана, 1964-йисан майдин вацралай, 1991-йисуз пенсиядиз фидалди, Велимет Керимовича «Рычал-су» заводда кIвалахна. Анжах тек са и заводда ада 27 йисуз галатун тийижиз санал кIвалахна.
Гзаф мукьуф гвай, умун къилихрин, вичин хивевай жавабдарвал дериндай аннамишдай намуслу инсан ва хъсан пешекар тир адал четин рейсериз, яргъал шегьерриз фин, углекислый газ хкун, «Рычал-су» ятар тухун, гьакIни жавабдар общественный маса кIвалахар тапшурмишиз хьана. Ада шофер яз кIвалахзавай вири и йисара ам фейи кьван рекьерин сан кьун четин я.
Вичин гзаф йисарин намуслу зегьметдалди хайи коллективра, хуьруьнвийрин арада лайихлу гьуьрмет къазанмишнавай производстводин кIвенкIвечи Велимет Керимович 2 сеферда райсоветдин ва кьве сефердани Кьасумхуьруьн Советдин депутатвиле хкяна. Адан шикил гзаф йисара чи райондин ва гьакIни республикадин недай хъвадай шейэрин промышленностдин министерстводин Гьуьрметдин Доскада хьана. Адаз, производстводин кIвенкIвечидиз хьиз, 1972-йисуз райисполкомдай, 1982-йисузни недай-хъвадай шейэрин промышленностдин министерстводай 5-выпускдин «Жигули» автомашинар чара авунай.
В. К. Керимован гзаф йисарин намуслу зегьмет гьукуматдин са жерге наградайралди ва къиметлу савкьватралди къейднава. ИкI, 1973-йисуз соцсоревнованидин гъалибчи хьайи, адакай гуьгъуьнлай 10 ва 11-пятилеткайрин зарбачини хьана. 1981-йисуз адаз Зегьметдин Баркаллувилин орден ва 1988-йисузни «Зегьметдин ветеран» медаль гана. Гьеле Армияда амаз КПСС-дин членвиле кандидат яз кьабулай ва I958-йисуз КПСС-дин членвилиз кьабулай ада, девирар, гзаф инсанар дегиш жезватIани, къенин юкъузни коммунистрин партиядиз ва адан идеалриз вичин вафалувал хуьзва.
- Инсандихъ са чин ва са рикI хьун лазим я, - лугьузва партиядин ва зегьметдин ветеранди. Ам Октябрдин революциядин 90 йисан юбилейдин медалдин сагьибни я.
50 йис идалай вилик эвленмиш хьайи, вичи райвоенкоматда, КГБ-дин райотделенида кIвалах авур вичин уьмуьрдин юлдаш белорус дишегьли, Баранкова Тамара Александровнадихъ галаз санал абуру аялар дарвал тагана хвена, чIехи авуна. Абурукай 3 дахъ кьилин ва садахъ юкьван пешекарвилин образование ава. Бубадин пешекарвал хкянавай Алексей алай вахтунда ветерандин патав гва. 4 аялдихъни чпин кIвал-югъ, хзанар хьанва.
I4 хтулдин буба тир Велимет Керимовичан рикI абурукай архайин я. Дуьз лагьайтIа, ада вичелай чешне къалуруналди, вичин веледриз гьеле гъвечIи чIавалай зегьмет кIанарна, намуслувилелди яшамиш жез чирна.
- Алай вахтар гьикьван муракаббур ятIани эхиримжи кьве йисан къене районда хъсанвилихъди жезвай дегишвилери, муниципальный райондин Кьил И. М. Яралиеван чалишмишвилери, гзафбурун хьиз, зи рикIизни теселли гузва, чи гележег къвердавай хъсан жедайдахъ инанмишвал артухарзава, - лугьузва ветеранди. – Къуй чи балайрин гележег бахтлу, райондин ад мадни хкаж хьурай!
Алай йисуз вич тешкилайдалай инихъ 80 йис тамам жезвай райондин экономика вилик тухуник вилик йисара вичин зегьметдин тайин пайни кутунал ветеранди гьахълудаказ дамахзава.
