Ингье гатун эхиримжи варз тир августни акъатна. Зулун сифтегьан варз тир сентябрь алукьнава. Ам гьихьтин гьаваяр гвайди жеда?
Дагъустандин гидрометцентрдин начальник Петр Поставика хабар гузвайвал, юкьван гьисабдалди и вацра 19-21 градус чимивал жеда, дагълух районра ада 14-16 градус тешкилда. Им алатай гзаф йисарин къалурунрив гекъигайла са градусдин гзаф я.
Вацран пуд лагьай паюна (декадада) гьавадин чимивал агъуз аватда ва ада йифен вахтунда 6-11 градус тешкилда, бязи дагълух районра лагьайтIа 4 градус чимивилелай са градусдал кьван къайивал жеда.
Гьа са вахтунда вацран сифтегьан паюна са бязи йикъара гьавадин чимивал 27-32 градусдив, дагълух районра 23-28 градусдив кьван агакьда.
И вацра къвалрин кьадар алатай йисарив гекъигайла юкьван гьисабдалди кьурла тIимил жеда ва ада Дагъустанда санлай 30-50 миллиметр, дагълух районрани 40-70 миллиметр тешкилда.
Санлай кьурла сентябрдин варз зулун магьсулрин тумар цун патал ва гьакIни ципицIар, емишар, майваяр кIватI хъувун, хуьруьн майишатдин маса кIвалахар кьиле тухун патал къулайди жеда.
ВацIара цин кьадар лагьайтIа алатай гзаф йисарин дережада аваз жеда.