ЦСПСД-дин (хзанриз ва аялриз социальный жигьетдай къуллугъ ийидай центр) реабилитационный отделенидин работникри Герейханован хуьруьн 2-отделенидай ва ЦIийи хуьряй къвезвай аялрихъ галаз чирвилерин йикъаз талукьарнавай гегьенш мярекат кьиле тухвана.
Центрдин директордин заместитель Алиева Имара Алиевнади аялриз чирвилерин йикъан сувар ва алукьзавай цIийи кIелдай йис мубарак авуна. Ахпа анин работникар тир С. Тагьировадин, Г. Мегьамедрагьимовадин, Р. Велибековадин, И. Ягъибековадин куьмекдалди гьазурнавай шадвилин программа кьиле тухвана.
Адан программадик аялри чирвилерин йикъаз, школадиз талукьарнавай шиирар, манияр, сегьнеяр, «Виридалай акьуллуди» тIвар алай къугъун квай.
Эхирдай аялри лезги авазралди кьуьлер авуна. И кардилай аялар гзаф рази яз амукьна.
Идалай алава яз, хзанриз ва аялриз социальный жигьетдай къуллугъ ийидай идарада са шумуд отделенидин работникри халкьдиз (хзанриз, аялриз) социальный жигьетдай къуллугъ ийизва. Ина социальный работникри, педагогри, психологри, духтурди, массажистди, тренажерный залда физкультурадин рекьяй инструкторди иниз чпин «Газелда» аваз гъизвай аялриз са вацран къене къуллугъ ийизва: инвалид аялриз, кефсуз хьанвай аялриз сагъламвал гуьнгуьна хутаз духтурдин гуьзчивилик кваз куьмек гузва.
