Районда махсус къарардин бинедаллаз эхиримжи вахтара михьивал хуьн таъминаруниз еке фикир гузва. Вири хуьрера михьивал хуьн патал субботникар кьиле тухузва, шегьре рекьин къерехра, чIехи хуьрерин куьчейра зир-зибилар вегьин патал ракьун контейнерар эцигнава ва абур вахт-вахтунда махсус чкайра ичIирзава.
Гьа са вахтунда михьивал хуьн патал вири халкьдин иштираквал тIимил я. Им анжах са хуьрерин администрацийрин, муаллимрин, медработникрин буржи туш. Эвелни-эвел агьалийри гьарда вичин кIвалин патав гвай сергьятда михьивал хвена кIанда. Туьквенар гвай ксари чпи кIвалахзавай чкайрин сергьят санитариядинни гигиенадин гьакъиндай къайдаяр хуьн тийиз, килиг тежедай гьалдиз гъизва: мороженыйрин, къенфетрин чарар, ичIи бутылкаяр ва ишлемишнавай пакетар, маса зир-зибилар варцаралди гадар тийиз харайриз яна жезва. Хуьрерин администрацийри, талукь органри чпин сергьятда авай алишверишдин точкайрин иесийривай михьивал хуьн гьар юкъуз истемишзавач.
Хуьруьн администрацияди алвердал машгъул гьар са работникдин везифаяр авай махсус къарар акъудна кIанда. Адан сергьятда михьивал хуьн хуьруьн депутатрин гьар йикъан гуьзчивилик хьун герек я. И кардал вири халкьди амал авун лазим я.
Завай са мисал гъиз жеда: Герейханован хуьруьн Советдин кьил а вахтунда А. А. Амирасланов тир. Ада гьафтеда са югъ санитарный югъ яз тайинардай. Зун а вахтунда и хуьруьн участковый инспектор тир. РОВД-дин са маса работник ва гьакIни медработник галаз чна вири хуьруьн куьчейрин, общественный чкайрин михьивал ахтармишдай ва герек тир серенжемарни кьабулдай. Ихьтин хъсан кIвалахар алай вахтунда, гьайиф хьи, хъийизмач. Хуьруьн участковый инспектор вуж ятIани халкьдиз чин тийизвай дуьшуьшарни жезва. Хуьруьн администрацияр къе чпин хуьрерин михьивал авун патал райондай гудай тапшуругъ гуьзетиз акъваззава.
Хуьруьн администрациядин, медработникрин, участковый инспектордин арада гьамиша сигъ алакъа хьана кIанда, амма и алакъа авач.
Заз и макъалада Герейханован хуьре авай гьалдал акъвазиз кIанзава. Вирибуруз чизва хьи, хъвадай цин патахъай Герейханован хуьруьн жемят лап кIеве авайди. Иниз хъвадай цин водопровод Агъа-СтIалрин сергьятдилай къвезва, адан яргъивал 4 километр я. АгъастIалкъазмайрин жемятди и хъвадай яд йифди-югъди чпин дердийра ишлемишзава (салар дигизва). Виликан Агъа-Макьарин цин линия ДаркIушрал кьван агакьзавайди тир. А водопроводдин линия Герейханован совхоздив вахкайдалай кьулухъ АгъастIалкъазмайрилай агъадихъ и линияда яд амач. Вучиз лагьайтIа, адаз иеси амач. ГьакIни хуьрерни чIехи хьанва. Герейханован хуьруьн администрацияди вичин сергьятда рекьин къерехар ачухарунин гьакъиндай къарар акъудна. Амма са бязи ксари и къарар кьиле тухузвач. Ихьтинбурун жергеда, гьайиф хьи, вичи гзаф йисара райондин, майишатдин кьиле акъвазна жавабдар къуллугъар авур Исмаилов Исмаил Къадировични ава.
И хуьруьн администрациядин кьил «ксанва» лагьайтIани жеда. КIвалах авуртIа ийиз жезвайди я. ИкI, эхиримжи вахтара Герейханован хуьруьн къене хъсанвилихъ са бязи дегишвилер жезва: стадиондал мешреб акьалтна, рекьин къерехра зир-зибилар аквазмач, хуьруьн юкьва авай парк арадиз хкиз башламишнава. Ибур вири и хуьруьн администрациядин кьилин заместитель тир Къазиагьмедов Къазиагьмедан алахъунар я. Аферин ихьтин кьегьал касдиз, ахьтинбуруз халкьдин арада гьамиша гьуьрмет ва авторитетни жеда.
За инал И. Къ. Исмаилован тIвар кьунин себебни ам я хьи, ада, гзаф масадбуру хьиз, виликдай са шумуд метрдив агакьна тротуарни кваз кIевна.
И. Къ. Исмаиловалай «чешне» къачуна амай къуншийрини рехъ кIевириз башламишнава. Герейханован хуьруьн 2-отделенида яшамиш жезвай М. Дадашевни и кардив «лап хъсандиз эгечIна», тротуардал магазиндин къванцин цлар эцигнава.
Идалайни алава яз и кьве хуьруьн арада авай «Машмашрин багъдай» арендадин чилер гвай ксарини багъдин кIанихъ галай дагълариз мал-къара тухуз-хкизвай чилин зулни кваз кIевирнава.
Райондин руководстводи шегьре рекьин къерехар гегьеншарунин месэла кIевелай гъиле кьунвайди ва и кар лазим тирди фикирда кьуна. И. Къ. Исмаилова кьунвай чкаяр ахъаюн сифте вичелай башламишунин гаф ганва. Чухсагъул адаз.
Мукьвара цIийи кIелунин йис башламиш жеда. Тротуар кьун себеб яз аялар школадиз машинрин рекьяй фин-хтуниз мажбур жеда. Им гзаф хаталу кIвалах я.
Чна гьар сада михьивал ва къанунар хуьн таъминарунал амал авун герек я.