Гьажимурадан диде-буба хуьряй катнава. Ругуд аял авай хзанда Гьажимурад тек са хва тир. Дагъустандиз атанвай В. Путин ва М. Мегьамедов а хзандихъ галаз гуьруьшмиш хьана. Дагъустан Республикадин прокурор, гила чи муниципальный райондин Кьил И. Яралиев Карамахи ва Чабанмахи хуьрерин агьалийрихъ элкъвена рахана. Ада къанунрал амал ийизвай гражданриз и хуьрера къанун-къайда хутаз куьмек це лагьана эвер гана.
29-август алукьзавай йифиз РФ-дин МВД-дин къенепатан кьушунри ва Дагъустандин милицияди Кадардин зонада къанун-къайда хутадай серенжемар кьабулиз эгечIна.
30-август. Россиядин Президент Б. Ельцина Кремлда Дагъустанда боевикрихъ галаз кьиле фейи женгера кьегьалвал къалурунай Россиядин Игитдин вад гъед вахкана. Игитрикай пудаз наградаяр телеф хьайидалай кьулухъ гана.
Дагъустандай Москвадиз хтай В. Путина журналистрин вилик лагьана: «Россия Кавказда икьван чIавалдини авай, гилани ама, гележегдани амукьда».
Карамахи, Чабанмахи хуьрера мягькем хьанвай экстремистриз тупарай ва авиацияди ракетрай цIай гузва. Анрай агьалияр катзава. Милициядин къуллугъчийри катзавайбур ахтармишзава. Ягъунра иштирак авунай шак фейи гьелелиг 46 кас кьунва.
31-август. Дагъустандиз РФ-дин МЧС-дин министр С. Шойгу атана. Ам республикадиз боевикрихъ галаз кьиле фейи ягъунрин нетижада ганвай зиянар арадай акъуддай, Россиядин Гьукуматди тешкилнавай комиссиядин регьбер я.
ДР-дин Госсоветди Буйнакский райондин Карамахи ва Чабанмахи хуьрера арадал атанвай гьалариз талукь къарар кьабулна.
И хуьрера гьалар къвердавай къизгъин жезва. Экстремистрин мягькемарнавай сенгерриз артиллерияди ва авиацияди ягъунар кьазва. КIеве гьатзавай боевикри Чечняда ва Дагъустандин маса чкайра авай чпин терефдарривай куьмек тIалабзава.
1-сентябрь. РФ-дин Гьукуматди кьабулнавай къарардин бинедаллаз, Россиядин Гьукуматдин резервдин фондунай Дагъустандиз куьмек яз 100 миллиион манат пул ахъайнава. Кадардин зонада къизгъин ягъунар давам жезва.
Дагъустанда кьиле фейи вакъиаяр себеб яз официальный Грозныйдинни чеченрин полевой командиррин арада гъулгъула гьатнава. Аслан Масхадова къейдна: «Республика мад са мусибатдин вилик акъвазарай ва гзаф къурбандриз рехъ гайи полевой командиррин нагьакьан гьерекатриз, ягь-намус рикIел гъана, къанунрин бинедаллаз къимет гун герек я».
Дагъустандихъ галаз стхавилин алакъаяр чIурунин тахсир кутуна, А. Масхадова Милли хатасузвилин къуллугъдин председатель М. Улугов Милли хатасузвилин советдикай хкудна.
2-4-сентябрь. Экстремистрихъ галаз женгер физвай район гила михьиз РФ-дин Оборонадин министерстводин гуьзчивилик кутунва. Иниз армиядин подразделенияр къвезва. Генерал-лейтенант Г. Трошев вири къуватрин командующий яз тайинарнава.
Армиядин авиацияди ва артиллерияди экстремистриз ягъунар кьун давамарзава. Федеральный яракьлу къуватрикай 13 кас кьена, 91-дал хирер хьана. Боевикрикай 100-далай виниз кьейибур ава.
Буйнакск шегьерда 4-сентябрдиз акьалтIай вагьши тахсиркарвал авунихъ яшайишдин кIвалер хъитIкьинарунихъ, адан нетижада гзаф кьадар инсанар телеф хьунихъ галаз ва Новолак райондиз къуншидал алай Чечен Республикадай бандитрин тешкилатар сухулмиш хьунихъ галаз алакъалу яз республикада гьалар лап къизгъин хьана.
5-сентябрь. Чечнядай агъзурдалай виниз боевикри Новолак райондал вегьена. Са суткадин къене абуру Гамиях, Шушия, Чапаево, Тухчар, Ахар хуьрер кьуна. Новолакское ва Дучи хуьрера МВД-дин къуллугъчияр абурухъ галаз ягъунрик экечIна. Милиционерриз куьмек яз федеральный яракьлу къуватрин подразделенияр рекье тунва. Бандитри кьунвай хуьрерай агьалияр катзава.
Боевикрин са десте Казбек райондани пайда хьана. Калининаул хуьруьн патав РОВД-дин къуллугъчияр абурухъ галаз ягъунрик экечIна. Боевикри кьулухъди чIугуна. Милиционеррикай 5 касдал хирер хьана.
(кьатI ама)