Государственный Думадин депутат Нуьдуьрбегов Асанбуба Нуьдуьрбегович райондин сечкичийрихъ галаз гуьруьшмиш хьана.
И гуьруьшмишвал «Сулейман-Стальский район» муниципальный райондин Кьил Имам Музамудинович Яралиева ачухна ва кьиле тухвана. Ада чи райондин экономикадиз ва яшайишдиз талукь месэлаяр вини дережада гьялун патал чи райондин баркаллу хва Асанбуба Нуьдуьрбеговича гьамиша вичелай алакьдай куьмекар гузвайди лагьана ва залда ацукьнавайбурун тIварунихъай ам хушвилелди тебрикна.
Гуьгъуьнлай И. М. Яралиева гаф Госдумадин депутат А. Н. Нуьдуьрбеговаз гана. Ада Госдумада важиблу месэлайрай законар кьабулун кьиле физвай гьалдикай, вичин иштираквиликай, вилик акъвазнавай везифайрикай лагьана. Ада чи халкьдин гележегдин къайгъуйрик квай чи гьакъикъи регьбер Имам Музамудинович Яралиева Дербент шегьердин округдин мэрвиле вичин кандидатура эцигун тебрикна ва и кардиз гьар сада вичелай алакьдай куьмек гуниз, адан тереф хуьниз эвер гана.
Ада залда ацукьнавайбурун патай атай са жерге суалриз тамам жавабар вахкана.
Эхирдай анал рахай И. М. Яралиева федеральный метлеб авай «Сардархуьр-ДаркIушкъазмаяр» водовод кардик кутун патал пулунин такьатар чара авунин жигьетдай куьмек гунай депутатдиз чухсагъул лагьана ва и жигьетдай къведай йисан федеральный бюджетдик майишатдин еке метлеб авай и чIехи объект эцигун давамарун патал пулунин такьатар чара авунин карда куьмек гун тIалабна. Ада гьакI хайи район абад хьун патал адан гележегдихъ рикI кузвай Госдумадин депутатди вичин хсуси такьатрин гьисабдай ЦIийи поселокдин кIанихъ галай обелискдин патав эрчIи пата (Жабаран базадин кIанихъ) Кьиблепатан Дагъустанда вичиз тешпигь авачир хьтин гегьенш спортдин Дворец эцигунин месэла гъиле кьун тебрикна ва адахъ сагъ чан, яргъал уьмуьр хьун, вичин хивевай халкьдин векилвилин жавабдар кIвалахда еке агалкьунар хьун кIанарна.
Гуьгъуьнлай райондин руководство чи баркаллу районэгьли Госдумадин депутат А. Н. Нуьдуьрбеговни галаз «Сардархуьр-ДаркIушкъаз-маяр» водопровод кардик кутун патал кIвалахар кьиле тухузвай чкадал фена.