Ингье, гатун эхиримжи варз тир августни алукьна. Чавай адавай вуч гуьзлемишиз жеда? И жигьетдай «Дагестанский ЦГМС» ГУ-дин начальник Петр Поставика икI лугьузва:
Вацран гьавадин чимивили юкьван гьисабдалди 24-26 градус, дагълух районрани 16-18 градус тешкилда. Им алатай гзаф йисарин къалурунрив гекъигайла са тIимил артух я. Агъуз тир температура вацран 2-декадада (10-20 йикъара) жеда. И йикъара йифен вахтунда гьавадин чимивили юкьван гьисабдалди 12-17 градус, дагълух районра лагьайтIа, генани тIимил, 5-10 градус тешкилда. Йикъан вахтунда чимивили 21-26 градусдихъ кьван, дагълух районрани 6-11 градусдихъ агакьна тешкилда. Им, гьелбетда, мад чимивал хъижедач лагьай чIал туш. Са бязи йикъара гьавадин чимивал 34-39, дагълух районрани 30-35 градусдихъ агакьда.
Къвалрин жигьетдай лагьайтIа, алатай гзаф йисарив гекъигайла юкьван гьисабдалди кьурла, нормадилай артух жеда. Норма 20-50 миллиметр я. Дагълух районра 40-90 миллиметрдихъ агакьда. Бязи йикъара къати марфар, гьакIни хар къун мумкин я.
Сад-кьве йикъар квачиз, санлай августдин варз яр-емиш кIватI хъувун ва хуьруьн майишатдин маса кIвалахар кьиле тухун патал къулайди жеда.
