Алатай июлдин вацра Чирагъ вацIай инсандин атIанвай кьил, гъил жагъана лугьуз халкьдин арада жуьреба-жуьре ванер акъатнавай. И ванер-сесерин бине ва гьакъикъат чирун патал чи махсус мухбир и йикъара РОВД-дин МОБ-дин начальник милициядин майор Сакаржаев Халид Абдуразакьовичахъ галаз гуьруьшмиш хьана ва адавай и жигьетдай гьихьтин делилар аватIа халкь газетдай хабардар авун тIалабна.
Агъадихъ чна адан суьгьбет гузва.
- Алай йисан 14-июлдиз чи РОВД-дин дежурный частуниз Сийидрин хуьруьн сергьятда Чирагъ вацIа эхъвезвай вахтунда яшар тамам тахьанвай аялриз валарин хилерин арада инсандин кьил акуна лагьана телефондай хабар гана.
Ам вуж ятIа чирун ва гьакIни гьеле малум тушир и акьалтIай залан тахсиркарвал ачухарун патал С. Стальский райондин ОВД-да вичин къурулушда криминальный милициядин начальник милициядин майор А. Б. Фатуллаев, МОБ-дин начальник тир зун, уголовный розыскдин оперуполномоченный милициядин старший лейтенант С. В. Сайидалиев, УУМ-дин чIехиди тир милициядин старший лейтенант Л. Х. Эминов, силисдин отделдин силисчи юстициядин лейтенант Р. Н. Бейбалаев, ДР-да авай МВД-дин ЭКЦ-дин районрин уртах экспертдинни криминальный отделдин старший эксперт-криминалист милициядин майор Ю. С. Юзбегов, старший конвой милициядин прапорщик Т. Б. Пирсенов аваз махсус группа тешкилна.
Савадлудаказ тешкилна кьиле тухвай оперативный ахтармишунрин серенжемрин вахтунда сифтедай кьенвайди вуж ятIа тайинарна. Ам, вич 1964-йисуз дидедиз хьайи, Удмуртия Республикадин Ижевск шегьердай тир, Хиврин хуьре яшамиш жезвай Сеферова Клара Николаевна яз хьана. Винидихъ къейд авур ОВД-дин сотрудникри оперативный делилар кIватIдай вахтунда малум хьайивал, 2009-йисан 30-июндилай 1-июлдин югъ алукьдай йифиз Хив райондин Хиврин хуьре вичин кIвале арадал атай чуьруькдин вахтунда вич 1985-йисуз хайи, санани кIвалах тийизвай Сеферов Руслан Алаудиновича вичин диде К. Н. Сеферова бамишарна кьена.
Йифиз дидедин мейит кIвалерин патав гвай тамуз тухвана, чилик кутуна. 2009-йисан 2-июлдиз Р. А. Сеферова вичин имидин гада тир, вич I986-йисуз дидедиз хьайи, Дербент шегьердин 345-стрельковый дивизиядин (15/10) тIварунихъ галай куьчеда яшамиш жезвай Алиев Максим Тиграновичахъ галаз санал йифиз К. Н. Сеферовадин мейит чиликай хкудна, ам пайи-паяр авуна, Хив райондин Хвережрин хуьруьвай яргъаз тухвана, Чирагъ вацIуз гадарна. Талукь делилар гъайидалай гуьгъуьниз Р. А. Сеферова ва М. Т. Алиева чпи авур кар тамамвилелди хиве кьуна.
И тахсиркарвиляй РФ-дин УК-дин 105-статьядин 2-паюнай уголовный делодин сергьятда аваз Р. А. Сеферовни М. Т. Алиев дустагъ авунва.
Са шакни алач, ихьтин вагьши тахсиркарвал авурбур чпин жазадивни агакьда.
- Тамам делилар гунай чухсагъул.
