10-августдиз «Сулейман-Стальский район» муниципальный райондин администрациядин гегьенш совещание кьиле фена. Ам муниципальный райондин Кьил Имам Музамудинович Яралиева ачухна ва кьиле тухвана. Ада къейд авурвал, Россиядин МЧС-дин Дагъустан Республикада авай Кьилин управленидин начальникдин приказдалди Сулейман-Стальский райондин государстводин пожарный надзордин отделенидин начальникдин къуллугъдал къенепатан къуллугъдин старший лейтенант Рамазанов Рустам Абдулаевич тайинарнава. Идахъ галаз алакъалу яз райондиз Россиядин МЧС-дин Дагъустан Республикада авай Кьилин управленидин (ОГПН-дин) начальникдин заместитель, къенепатан къуллугъдин подполковник Тажудин Мустафаев ва жавабдар маса работникар атанва.
Гаф Т. Мустафаеваз гана. Ада совещанидал Россиядин МЧС-дин Дагъустан Республикада авай ОГПН-ди цIаяр кьунрин, чIуру маса кIвалахрин вилик пад кьунин, агьалийрин арада гъавурда тунин рекьерай тухузвай кIвалахрикай, и рекьерай федеральный дережада ва республикада кьабулнавай законрикай лугьунихъ галаз санал, ада чи райондин ГПН-дин отделенидин начальникдин къуллугъдал Дагъустан Республикада авай ОГПН-дин управленидин начальник Нариман Къазимегьамедован приказдалди къенепатан къуллугъдин старший лейтенант Рустам Рамазанов тайинарнавайди лагьана, адан алакьунар, пешекарвилин дережа къейдна, адахъ цIийи къуллугъдал агалкьунар хьана кIанзавайди лагьана.
Совещанидал рахай Рустам Рамазанова вичиз авур ихтибардай Управленидин руководстводиз чухсагъул лагьана ва райондин руководство инанмишарна хьи, хиве тунвай жавабдар везифаяр, авунвай ихтибар кьилиз акъудун патал вичин вири къуватар эцигда.
Имам Музамудинович Яралиева райондин пожарный надзордин отделенидин начальниквилин къуллугъдал тайинарун Рустам Рамазановаз кьилди вичин, муниципальный райондин администрациядин, депутатрин Собранидин патай мубаракна, адахъ кIвалахда агалкьунар хьана кIанзавайди лагьана.
Гуьгъуьнлай давам хьайи совещание райондин администрациядин Кьил Ш. Гь. Мегьамедханова кьиле тухвана.
Анал гатун каникулрин вахтунда школьникри ял ягъун тешкилнавай гьалдикай РУО-дин начальник Ж. Асланован, агьалияр ва майишатар дигидай целди таъминарун авай гьалдикай УОС-дин кьилин инженер М. Гьуьсейнован ва агьалийрин кьилдин категорийриз федеральный законрин бинедаллаз гузвай кьезилвилерикай УСЗН-дин начальник Ж. Бремован информацийрихъ яб акална.
Анал рахай Ш. Гь. Мегьамедханова и месэлайрай гьял тавунвай кIвалахрикай, рехъ гузвай кимивилерикай лагьана, абур арадай акъудун патал талукь къуллугърин вилик тайин везифаяр эцигна.
Гуьгъуьнлай Ш. Гь. Мегьамедханова мукьвара уьлкведа эцигунардайбурун югъ къейд авурдакай, идахъ галаз районда эцигунрин рекьяй тухузвай кIвалахрикай гегьеншдиз суьгьбетна, и хиле гьакъисагъвилелди кIвалахзавай са шумуд касдив ДР-дин эцигунрин министерстводин, муниципальный райондин администрациядин Гьуьрметдин грамотаяр ва 5000 манатдин кьадарда аваз пулунин пишкешар вахкана.
