16-февралдиз «Сулейман-Стальский район» муниципальный райондин Кьил Нариман Шамсудинович Абдулмуталибова вичин кабинетда райондин информационный агентстводик акатзавай райондин сайтдин, «Куьредин хабарар» газетдин ва Кьасумхуьруьн телевиденидин журналистар, амай пешекарар кьабулна.
Сифтедай ада районда кьиле физвай цIийивилерикай, федеральный ва республиканский дережада кьабулай программаяр, проектар районда уьмуьрдиз кечирмишзавай гьалдикай, абурун истемишунрикай, районда инвестиционный майданар кардик акатзавайдакай, хуьрера кьиле тухузвай эцигунрикай, аваданламишунрин кIвалах-рикай, абурун гьакъиндай агьалияр хабардар авунин карда СМИ-рин такьатрин вилик акъвазнавай везифайрикай лагьана.
- Гьелбетда, вахт виликди физва, ида СМИ-рин такьатри чпин кIвалахда цIийивилер тунни истемишзава, - лагьана Н. Ш. Абдулмуталибова.
Райондин Кьилин куьмекчи Мурад Штибегович Алибегован ва информационный агентстводин руководитель Жабраил Агъамирзоевич Асланован иштираквални аваз кьиле фейи гуьруьшдал массовый информациядин такьатрин вилик акъвазнавай везифайрикай, кIвалахда тун лазим тир цIийивилерикай, вахтунин истемишунрикай Н. Ш. Абдулмуталибова гегьеншдиз суьгьбетна.
Гьа са вахтунда, хуьрера гьял тавунвай, агьалийрик секинсузвал кутазвай месэлаярни тIимил амач. Н. Ш. Абдулмуталибов абурални акъвазна. ИкI, саки вири хуьрерин поселенийра чиркинвилериз рехъ гузва, куьчеяр, рекьерин къерехар зирзибилдин хъуртариз элкъуьрнава, маларикай вири икрягь хьанва. Терроризмдин ва экстремизмдин хаталувални зайиф хьанвач. Нариман Шамсудинович Абдулмуталибова лагьайвал, журналистар ихьтин кIвалахривайни къерех хьана кIандач. ЧIуру кIвалах критика авун, арадай акъудун гуьзчивилик кутун лазим я.
Куьрелди лагьайтIа, Н. Ш. Абдулмуталибованни райондин СМИ-рин работникрин арада ачух, маналу суьгьбет кьиле фена. Са рахунни алачиз, ихьтин гуьруьшри вичин хъсан нетижани гуда.
Хазран Кьасумов.