Чилин къадир авай, зегьметдал рикI алай инсанар яшамиш жезвай Эминхуьре 1980-йисара районда кIвенкIвечи карханайрикай сад тир «Аламишинский» совхоз кардик квай. Маса культураяр битмишарзавай майданар квачиз, адахъ 400 гектардилай виниз майданра уьзуьмлухар авай. Гьайиф хьи, «перестройкадин» ялав адахъни галукьна: гьар са гектардай 80-110 центнер ципицIар кIватI хъийизвай уьзуьмлухар тахьай мисал хьана. Бейкарар яз амукьай гзаф эминхуьруьнвияр, иллаки жегьилар, патарал фена…
Шадвалдай кар ам я хьи, эхиримжи йисара чIехи шаир Етим Эминан тIвар алай хуьрени хуьруьн майишатдин кIвалахар гуьнгуьна гьат хъийизва. Кьилди къачуртIа, са шумуд касди, чилин участокар арендада къачуна, цIийи уьзуьмлухар, багълар кухтунва, салан майваяр, халияр, техил гьасилзава.
Инвесторди тешкилнавай «ЧIереяр» ООО инициатор яз хуьруьн поселенидин территорияда уьзуьмлухар кутунин рекьяй тухузвай кIвалах иллаки екеди, тариф авуниз лайихлуди я. Инвестиционный проектдин бинедаллаз ООО-да 150 гектарда уьзуьмлухар кутун лазим я.
Са шумуд йисуз гадарнаваз, кул-кусди кьунваз хьайи участок дуьзарна, къайдадиз гъана, 2014-йисуз карханади 48 гектарда гьяркьуь жергейрин цIийи уьзуьмлухар кутуналди, инвестиционный проектдин сад лагьай пай кьилиз акъудна.
«АПК вилик тухун» кар алай проектдин сергьятра аваз 2015-йисан эхирра инвестиционный проектдин кьвед лагьай пай уьмуьрдиз кечирмишунив – цIийи уьзуьмлухар кутунин кIвалах давамарунив – эгечI хъувуна. Са куьруь вахтунда 35 гектарда цIийи уьзуьмлухар кутуна, и кIвалах давамни хъийизва. И кар патал чил, дериндай къарагъарна, планировка авунва, цадай бес кьадар чубукарни чкадал ала.
ЦIийиз кутунвай уьзуьмлухриз гуьгъуьналлаз ятар гузва, вилик йисара кутур уьзуьмлухра столбаяр акIурзава.
Чаз акурвал, «ЧIереяр» ООО-дин уьзуьмлухар чешнелу гьалда ава, анра михьивал, къайда ава. Ида къалурзава хьи, гьам агрономри, гьам рабочийри тамамарзавай кIвалахдин еридиз фикир гузва.
ЦIийи уьзуьмлухар кутунин, гьакIни вилик йисара кутунвайбурухъ гелкъуьнин карда И. Османова, З. Меликовади, Н. Къурбановади, М. Мегьамедова, Н. Рамазановади, Р. Асланова, С. Къурбановади ва масабуру чIугвазвай зегьмет тариф авуниз лайихлу я.
Са рахунни алачиз, инвестиционный ихьтин чIехи проект кардик акатуни хуьруьнвияр кIвалахдалди таъминаруниз, патарал фенвай жегьилар элкъвена хайи ерийрал хтуниз куьмекда.
Инвестиционный проектрикай рахадайла, райондин хуьруьн майишатдин отделдин начальник М. Бабаева чаз лагьайвал, «КIварчагъ», «Зардиян», «Гюльгери-вацI», «Дере», «Даркуш», «Агро» ООО-рихъ, «Кахриманов» ИП-дихъ, «Заря» СПК-дихъ ва маса карханайрихъ галаз санал, «ЧIереяр» ООО-дини «Районда 2013-2020-йисара уьзуьмчивал вилик тухун» муниципалный программа кьилиз акъудуник еке пай кутазва. И программадин бинедаллаз 2020-йисуз районда уьзуьмлухрин майданар 2000 гектардив агакьда.