Ам, акъваз тийиз, виликди фида, я сергьятар, я манийвилер чин тийиз. Эхь, куьне кьатIайвал, ихтилат вахтуникай физва, дагъдин гурлу вацIу хьиз, гьамиша виликди еримишзавай.
Гьа секинвал, архайинвал авачир вахт себеб яз, ингье, Ц1егьренди хьайи 2015-йис акъатна, ам Маймундин йис тир 2016-йиса эвезна.
Гзаф маса чкайра хьиз, ЦIийи йисан шадвилер вичиз гьахълудаказ кьегьал рухвайринни баркаллу рушарин макан лугьузвай СтIал Сулейманан тIвар алай чи райондани хъсан тешкиллувал ва агьалийрин активвал аваз кьиле фена.
2015-йисан 31-декабрь. Пакаман сятдин 10-даз райондин администрациядин заседанийрин залда муниципальный райондин Кьил Нариман Шамсудинович Абдулмуталибов администрациядин работникрихъ галаз гуьруьшмиш хьана. Райондихъ акъатзавай йисуз социальный, экономикадин ва маса рекьерай хьайи нетижайрикай, вилик акъвазнавай везифайрикай лугьунихъ галаз санал, ада администрациядин работникриз алукьзавай ЦIийи йис вичин ва Собранидин депутатрин патай мубаракна, абурухъ гьар са карда агалкьунар, хзандин бахтлувал хьана кIанзавайди лагьана.
Тебрикдин гафар гваз анал гьакIни райондин администрациядин Кьил Штибег Мегьамедханов, райондин Общественнный палатадин председатель Алимет Мейланов, райадминистрациядин крар идара ийизвайди тир Рамазан Абдулазизов ва маса юлдашар рахана.
ЦIийи йисан ярж, асул лишан, гьелбетда, елка я. Сятдин 1-даз райондин И. Гь. Тагьирован тIварунихъ галай Россиядин халкьарин адетдин культурадин Центрадин вилик квай майдандал эцигнавай елкадин патав (лагьана кIанда, мад са елка райцентрадин майдандални эцигнавай) ЦIийи йисан шадвилин чIехи мярекат кьиле фена.
Къейд ийиз кIанзава хьи, ЦIийи йис вичин «къакъудиз тежедай юлдашар» тир мекьивилер ва жив галаз атана. Виликан йикъар умун гьава авайбур хьанатIани, 31-декабрь Куьреда, лугьудайвал, «къван паддай хьтин» аязар ва жив авайбур хьана. ТIебиатдини вахтуниз шериквал ийизва!
ЦIийи йисан мярекатда кьиле Нариман Шамсудинович Абдулмуталибов аваз администрациядин жавабдар работникри, общественный тешкилатринни районда кардик квай къуллугърин руководителри, гзаф кьадар районэгьлийри (гзаф инсанар чпин аяларни галаз атанвай, ида мярекатдал мадни абур гъизвай) иштиракна.
Тебрикдин сифте гаф муниципальный райондин Кьил, депутатрин Собранидин Председатель Нариман Шамсудинович Абдулмуталибов рахана.
- Гьуьрметлу районэгьлияр, играми дустар! – лагьана Н. Ш. Абдулмуталибова. – Ингье, мад са йис акъатзава, 2015-йис тарихдиз физва. Хъсан патахъайни и йис район, адан агьалияр патал рикIел аламукьдайди хьана. Гьайиф хьи, рикIер тIарай, инсанрик къурхуллувал кутур крар-кIвалахарни тахьана амукьнач. Чаз чIуру кIвалахар герек туш. Ша чна гьа чIуру кIвалахар, чIуру ниятар акъатзавай йиса тан, цIийи йисаз къени мурадар, хъсан ниятар аваз кам вегьен. Акъатзавай йисуз районда авунвай хъсан кIвалахрин кьадар гзаф я. Чи район экономика вилик тухунин, эцигунрин, социальный рекьерай, инвестицияр желб авунай виликди физва, и кардиз республикадин руководстводини къимет гузва. Заз алукьзавай йисуз районда хъсан кIвалахар мадни гзаф хьана кIанзава, абур чна ишлемишни ийида. Чи халкь камаллуди, мугьманпересди, зегьметдал рикI алайди, гележегдиз умудлудаказ килигзавайди я. Гьавиляй зун инанмиш я: районда ислягьвал, гьуьрмет-хатур, алкьунар, хъсан кIвалахар жеда.
За квез райондин Собранидин депутатрин, администрациядин ва кьилди жуван патай алукьзавай ЦIийи йис рикIин сидкьидай мубаракзава. Къуй алукьзавай йисуз районэгьлийрихъ мягькем сагъламвал, хзанра бахт-берекат, веледрикай рикIин динжвал хьурай!
ЦIийи йисан сувар кIватI хьанвайбуруз Аяз Бубади ва Живед руша мубаракна, Аяз бубади аялриз савкьватар гана.
Н. Ш. Абдулмуталибова ЦIийи йисан шадвилин мярекатдал «Ашагасталь» КФХ-дин руководитель Мегьамедэмин Гьамзатовав РФ-дин хуьруьн майишатдин министерстводин, Эминхуьре кардик квай «Аллагьвердиев» КФХ-дин механизатор Гьажимет Аллагьвердиевав Дагъустан Республикадин Гьукуматдин ва Курхуьрел кардик квай «Кюре» карханадин руководитель Тагьирмирзе Таибовав ДР-дин хуьруьн майишатдин ва суьрсетдин министерстводин Гьуьрметдин грамотаяр шад гьалара вахкана.
Гуьгъуьнлай райондин Культурадин Дворецдин гьевескарри ва райондин музыкальный школадин аялри суварин чIехи концерт гана…
Алукьнавай йисуз хъсан крар, агалкьунар, шад мярекатар Куьредин чилел мадни гзаф хьурай!