“Куьредин Ярар” – 25

Лугьудайвал, халкьдин къажгъан муркIадални ргада. И тешкилатни гьакI я. Халкьдин адетдин векилри - муаллимри, шаирри, журналистри, манидарри, музыкадин устадри, ктабрал рикI алайбуру, художникри, кьуьлердайбуру арадал гъанва. Райондин вири тешкилатрихъ, идарайрихъ, руководстводихъ галаз сих алакъаяр хуьзва, и карди адаз къаюмвалдайбурни, майилвалдайбурни, куьмекчиярни, крарик кьил кутадайбурни, гьевескарарни артухарзава.

Руьгь къуватлу беден садавайни кIудиз жедач, ам вири имтигьанрал, четинвилерал гъалиб жеда. Руьгь сагълам халкь гьихьтин къуватдиз элкъведатIа чи умуми тарихди хъсандиз субутзава. Ватан хвейибур, хуьзвайбур, хуьдайбурни руьгь сагълам несилар я? “Куьредин Ярарихъ” гьахьтин, вирибуруз хуш къведай, вичел фикир желбдай, халкь агуддай метлеб авайди адан 25 йисан рекьи хъсандиз субутзава. “Куьредин Ярар” са Куьрединди яз амач. Ада къуншидаллай Хив, Мегьарамдхуьруьн, Дербент, Докъузпара, Ахцегь, Кьурагь, гьатта Азербайжан Республикадин лезгийринни яратмишдай векилар сад-садаз чирзава, агудзава, мумкинвилер халкьдиз раиждай рекьер ачухарзава. И кардини им кьетIен тешкилатдиз элкъуьрнава.

И вири сирерикай ва метлебрикай, тешкилат агакьнавай дережайрикай, вилик квай цIийи месэлайрикай хуш келимаяр и мярекат ачухдайлани, агалдайлани Сулейман-Стальский райондин кьил, бажарагълу алим ва тешкилатчи, вични яратмишунрин яцIа лигим хьанвай регьбер  Нариман  Шамсудинович  АБДУЛМУТАЛИБОВА  лагьана.

Инал са фикир мад рикIел къвезва: вучиз ихьтин гьунарлу тешкилат анжах са Сулейман-Стальский районда арадал атанва? Бес винидихъ тIварар кьунвай районра яратмишдай ксар - шаирар, художникар, журналистар, культработникар авачни? Аквар гьаларай, районрин кьилевай сагьибар, иллаки культурадинни об¬разованидин хилерин векилар са маса жуьрединбур я. Эгер 40-50 йисуз районда литературадин чIехи са межлис тешкилдай, чпин чилел (хуьрера) хана, чIехи хьанвай, машгьурвал къазанмишнавай устадрин хьайитIани юбилеяр къейддай “вахт авачир” сагьибриз “Куьредин Ярар” хьтин тешкилат бажагьат хуш жеда. Гьавиляй мад сеферда тикрарзава: “Куьредин Ярар” кьетIенди, халкьдин руьгьди арадал гъанвайд, вирида сад хьана хуьзвайди, вичин сергьятар генани гегьеншарзавай, вичелай чешне къачуниз лайих авай тешкилат я.

Мярекатдал рахай гзаф ксари ам арадал гъуник кьил кутур муаллимар ва шаирар тир Нажмудин Шихнабиеваз, Сажидин Саидгьасановаз, Абидин Камиловаз, Шагьабудин Шабатоваз, Агьмедпаша Агьмедпашаеваз, композитор Маина Абдулмуталибовадиз, маса ксариз сагърай лагьана.

Чеб и тешкилатдин вилик жергеда хьайи рагьметлу Абдулбари Магьмудов, Абдурагьман Межидов, Салигь Селимов хьтин устадар  хушвилелди рикIел хкана.

Генани са кар. Им “Литературадин йисни” агалуниз талукь мярекат хьуниз килигна, пакам кьиляй ам ЦIийи Макьарал писатель ва драматург Абдулбари  МАГЬМУДОВАН тIвар эбеди авунин лишан яз, цIийи къулай са куьчедин кьиле кIвалерин цлал махсус кьул (мемориальная плита) ачухунилай, куьчедиз адан тIвар янавайди раиж авунилай башламишна. Иниз райондин руководство, гзаф мугьманар хтанвай.

ИкI башламиш хьайи мярекат Кьасумхуьрел давам хьана.

Мад са кар къейд тавуна жедач. Мярекатдин иштиракчийри - “Куьредин Ярарин” векилри чпиз бинедилай куьмекар гайи (Устав туькIуьриз, ам тестикьариз, ахпани кIвалахиз) райондин регьберрин тIварар хушвилелди рикIел хкана, абуруз сагърай лагьана. Абурун жергеда а чIаван партиядин райкомдин секретарь Мусаиб  АГЬМЕДОВ, райисполкомдин председатель Даир  ОСМАНОВ,  ахпани Гьамид-Эфенди  НЕЖВЕДИЛОВ,  Имам  ЯРАЛИЕВ  ава. “Куьредин Ярарин” къуват райондин культурадинни информациядин управленидин кьилиз шаир ва педагог  Майрудин  БАБАХАНОВ атайдалай кьулухъ мадни гужлу хьайиди и межлисдин иштиракчийри кьетIендиз къейдна.

Квекай ибарат я и тешкилатдин кIвалах? Ада райондин культурадинни уьмуьрдин саки вири хилериз къуллугъзава. Тек са чIехи шаирринни арифдаррин (Куьре Мелик, Етим Эмин, СтIал Сулейман, Алкьвадар Гьасан, Алибег Фатахов ва мсб), абурулай гуьгъуьниз чи йикъарин яратмишдай ксарин (Сажидин, СтIал Мислимат, Нажмудин Шихнабиев, Абдулбари Магьмудов, Абдурагьман Межидов, Шагьабудин Шабатов, Тажидин Мегьамедов ва масабур) 20-далай виниз литературадинни музыкадин межлисар тешкилна, гьакьван ктабар, буклетар чапдай акъудна, халкьдиз раижна.

Районда лап вижевайдиз “Яран суварар”, “Гамарин сувар”, “Хайи чIалан варцар”, маса мярекатар тешкилна. Ина саки вири хуьрерин культурадин идарайрин, школайрин арада халкь руьгьламишунин кIвалах гужлу авунин бягьс (акъажунар) кьиле физва. Им “Куьредин Ярарин” таъсир тирдал шак алач. Гьавиляй районда экономикадин, яшайишдин хилерани аквадай хьтин дегишвилер кьиле физва.

“Куьредин Ярарихъ” гьа и тIвар алай газет авай, гила ам журналдиз элкъуьрнава, подписка тешкилнава. Куьрелди, ихьтин сигьалдик кваз кIвалах тухузвай тешкилат хьуни Сулейман-Стальский район санлай шииратдинни культурадин Меккадиз элкъуьрнава. И карди аяларни жегьилар чIуру рекьеривайни гьерекатривай къакъудзава, лап четин уламрай экъечIдай мумкинвал хуьзва. Гьелбетда, гьар са район патал им чешнедин кIвалах я. И кар мярекатдал рахай хейлин ксари къейдна. Чнани къейдзава.

“Лезги газетдин” кьилин редактор А.Саидова, ЛПС-дин правленидин председатель М.Алимова, муаллим ва шаир Ф.Несрединова, шаирар Д.Эмирбегова, А.Мирзебегова, Сажидина ва гзаф маса ксари юбилярар рикIин сидкьидай тебрикна, хъсан крарин тарифна.

Эхирдай тешкилатдин активистрив Гьуьрметдин чарар ва лайихлу пишкешар вахкана.

Райондин школайрин аялри ва гьевескар артистри межлисдиз мадни еке гурлувал гана. Абуру устадвилелди шиирар кIелна, манияр лагьана.

Чна “Куьредин Ярар” ихьтин цIараралди тебрикзава:

 

 

Мердали  ЖАЛИЛОВ  

Нариман  ИБРАГЬИМОВ