Дербент шегьер юбилейдиз гьазурунин кIвалахар йигин жезва.
ЦIийи кьилелай туькIуьр хъийизвай куьчейрикай кьуд - Мамедбегован, Буйнакский, Къурбанован ва Ленинан, саки туькIуьр хъувунва.
И йикъара «Нарт» ООО-дин эцигунардайбур III-Интернационалдин тIварунихъ галай куьчеда селлерин канализация тухунал машгьул я. Икьван гагьда и куьчеда бордюрар ва экверин тарар дегишарнава, тротуарра плитка тунва, тарар цанва, кIвалерин къецел патарин акунар дуьзмишнава. КIвалахар куьчедиз къир цуналди акьалтIарда.
Гь.Алиеван куьчени реконструкция ийиз гатIумнава. И куьче¬да кIвалахар фадлай башламишна кIанзавайди тир. Са бязи себебриз килигна, хьанач. Гила кIвалахрин еришар йигинарзава. ИкI, инженерный коммуникацияр, экверин система ва бордюрар дегишарзава. Лугьун лазим я, цIийи кьилелай туькIуьр хъувунин нетижада куьче 18 метрдин гьяркьуь хьанва. И куьчеда авай «Кырхляр» сурарин парудин чиниз къванцин плита янава.
Гагаринан куьчени цIийи кьилелай туькIуьр хъийиз гатIумнава. Вири куьчейра хьиз, инани бордюрар дегишарнава, тротуарда плитка тун патал лазим тир материал гъанва. Эцигунардайбуру лугьузвайвал, вири кIвалахар августдин вацран юкьвариз акьалтIардайвал я.
Малум тирвал. юбилейдиз гьазурвал акунин программадик куьчеяр цIийи кьилелай туьхкIуьр хъувунилай гъейри, кьуд паркни ква. Анра кIвалахар гьикI физва?
Чун шагьид хьайивал, ЧIехи Гъалибвилин 70 йисан суварин вилик Советрин Союздин Игит Шамсулла Алиеван тIварунихъ галай Женгинин Баркаллувилин паркуни шегьерэгьлийрин ва суварин мугьманрин вилик вичин ракIар ахъайна. Инаг алай вахтунда гуьрчегвилелди ва ял ягъун патал къулай шартIар тешкилуналди шегьердин сад лагьай паркуниз элкъвенва. Иниз шегьерэгьлияр аяларни галаз ял ягъиз къвезва.