Гад гьарай я, лугьузва бубайрин мисалда. Гьакъикъатдани, гад тамамвилелди вичин ихтиярда гьатнавай алай вахтунда хуьруьн майишатдин карханайрин, лежбервилинни фермервилин майишатрин, арендаторрин къайгъуяр къалин жезва.
- Багъларани никIера, саларани бустанра агротехникадин серенжемар кьиле тухунихъ галаз санал, райондин зегьметчийри общественный мал-къара патал алафар гьазурзава, и йикъара абур никIерай гад кIватI хъувунивни эгечIнава, - лагьана чаз «Сулейман-Стальский район» муниципальный райондин хуьруьн майишатдин ва суьрсетдин отделдин начальник Мегьамедзагьид Бабаева.
Районда сифтебурукай яз техилар кIватI хъувунив «Горец» ва «Зардиян» ООО-яр эгечIнава. Анра кьве комбайниди мух язава, юкьван гьисабдалди гьар са гектардай 25-26 центнер техил жезва.
Чаз малум хьайивал, «Горец» ООО-да 270, «Зардиян» ООО-да 60 гектарда техилар цанва.
- Санлай къачурла, алай йисуз чна 1982 гектардай гад агудун лазим я, - давамарзава М. Бабаева. – И кардал 11 комбайн, самар туькра кьунал пресс-подборщикар галай 12 трактор машгъул жеда.
Чаз акурвал, винидихъ тIварар кьунвай карханайра, Курхуьруьн арендаторрин, «Ашагастальский» ЗАО-дин ва маса майишатрин никIера техилдин хъсан бегьер агакьнава.
Кьезил шагьвардал лепе гузвай къизилдин ранг алай магьсулрин никIер ва гад агудзавай комбанияр акурла, чаз лугьуз кIанзава: квез къуватар хьурай, магьсулдарар!
Хазран Кьасумов.