22-апрелдиз дуьньядин пролетариатдин регьбер, Советрин гьукумат тешкилайбурукай сад тир, зурба камалэгьли Владимир Ильич Ленин хайи юкъуз, кьиле КПРФ-дин Сулейман-Стальский райондин отделенидин райкомдин 1-секретарь Абдулазизов Рамазан Абдулалимович аваз са десте партиядин ветеранар райцентрдал алай В. И. Ленинан гуьмбетдал цуьквер эцигиз фена. Абур гуьмбетдал физвай рекьин кьве пата гъилера цуькверин кIунчIар аваз жергейра ва гьакIни гуьмбетдин вилик гьуьрметдин къаравулда акъвазнавай Кьасумхуьруьн 1-нумрадин СОШ-дин пионерри хушвилелди, цуьквер вугуналди, кьабулна.
Гуьмбетдал цуьквер эцигайдалай гуьгъуьниз адан патав митинг кьиле фена.
Анал и лишанлу югъ мубарак авунин, са чIавузни магълуб тежер социализмдин идеалрикай, абурун важиблувиликай, алай вахтунда Украинада кьиле физвай вакъиайрикай чпин фикирар гваз Рамазан Абдулазизов, Алимет Мейланов, Велимет Керимов, Шагьабудин Шабатов рахана.
А. Камилов