Алатай йисан мартдин вацра чи Ватандин меркез Москвада «Совершенствование организации и качества гериатрической помощи городскому населению» темадай Курхуьрелай тир Рагьимова Зарлу дидедин хтул Ремидади медицинадин илимрин кандидатвилин диссертация агалкьунралди хвена.
Рагьимова Ремида Шакировна. Ам вуж я? Ам 2002-йисуз Курхуьруьн юкьван школадиз вичин тIвар ганвай рагьметлу Рагьимов Мирзекерим Мегьамедрагьимовичан хтул я.
И хзандиз гьакъикъатдани духтуррин хзан лугьуз жеда.
Ремидадин ими Разин Мирзекеримовича 2001-йисалай Махачкъаладин медакадемияда лечебный факультетдин декан яз кIвалахзава. Ам медицинадин илимрин доктор, профессор я. Адан кьве веледдини Москвадани Махачкъалада медакадемийра кIелзава.
Эме Дурия Мирзекеримовна, медицинадин илимрин кандидат, медакадемиядин преподователь я.
Ими Батрас Мирзекеримовича Америкада сарарин духтур яз кIвалахзава.
Махачкъаладин 16-нумрадин школадиз кIелиз фейи Ремида сифте классрилай башламишна амай аялрилай тафаватлу жезвай. КIуьд лагьай класс хъсан къиметар аваз акьалтIарай зигьинлу руша кIелун Дагмедакадемияда кардик квай махсус классда давамарна ва ина 1999-йисуз 10-класс вири вадралди куьтягьна.
Дагъви руш Дагъустандин медакадемиядин лечебный факультетдиз, анжах са имтигьан вахкана, гьахьна.
Вири йисара имтигьанар анжах «вадралди» вахкуз хьайи Ремидади медакадемия яру диплом къачуналди акьалтIарна. Тайин пеше къачудай вахт алукьна. Жегьил пешекарди 2005-2007-йисара Махачкъаладин клинический ординатурада терапиядай чирвилер къачуна.
2007-йисуз ам заочнидаказ аспирантурадиз гьахьна ва ада медицинадин илимрин доктор, профессор Гьажиев Рашид Сейфиевичан регьбервилик кваз «Совершенствование организации и качества гериатрической помощи городскому населению» темадай илимдин кIвалах кхьиз башламишна.
Гьа са вахтунда, кIелунни давамариз, ам кардиологиядай вичин чирвилер хкаждай курсариз фена ва Республиканский медицинский центрада кардиологвиле кIвала-хални акъваззава.
Диссертациядин винел кIвалахзавай вахтунда ада хейлин ахтармишунар кьиле тухвана, вичин темадиз талукь яз илимдин 13 кIвалах чапдай акъудна.
2012-йисан 12-мартдиз Ремидади Москвада диссертация агалкьунралди хвена.
Официальный аппонентар тир медицинадин илимрин докторар, профессорар Щепин Владимир Олеговича, Голухов Георгий Натановича ва гьакI анал рахай маса алимрини диссертациядин кIва-лахдихъ еке метлеб авайди ва ам медицинадин илимрин кандидатвилин тIварцIиз лайихлу тирди лагьана.
Диссертацийрин Советдин членри сесер гуналди, Рагьимова Ремида Шакировнадиз медицинадин илимрин кандидатвилин тIвар гунин къарар акъудна.
Москвадай хтай жегьил алимдиз Дагъустандин медакадемиядин терапиядин кафедрадиз кIвалахал атун теклифна.
Алай вахтунда Ремидади больницада духтур-кардиолог яз, медакадемиядани медучилищеда студентриз чирвилер гузвай преподователь яз кIвалахзава.
Гьа са вахтунда жегьил алимди докторвилин диссертациядин винелни кIвалах давамарзава.
Мубаракрай вичиз! Мадни еке агалкьунар хьурай, чIехи дережайрив агакьрай вун, Ремида!
Асият Мусаева