21-октябрдиз «Сулейман-Стальский район» муниципальный райондин администрациядин нубатдин совещание кьиле фена. Адан кIвалахда администрациядин управленийринни отделрин, карханайринни организацийрин руководителри, хуьрерин поселенийрин кьилери, районда кардик квай общественный организацийрин векилри иштиракна.
Совещание райондин администрациядин Кьил Штибег Гьажимегьамедович Мегьамедханова ачухна ва кьиле тухвана.
Совещанидал районда ципицIар кIватIна акьалтIарунин нетижайрикай ва 2014-йисан магьсулрин бегьер патал цанар цазвай гьалдин гьакъиндай «Хуьруьн майишатдин ва суьрсетдин управление» муниципальный казенный карханадин руководитель М.М.Бабаева информация авуна. Ада къейд авурвал, районда эхиримжи йисара уьзуьмчивал вилик физва. Инвестиционный программа уьмуьрдиз кечирмишуналди районда гекъигайла чеб чIехибур яз гьисабиз жедай карханаяр тешкилна, хейлин майданра цIийи уьзуьмлухар кутуна. 2013-йисуз уьзуьмлухри кьунвай майданар 1077 гектардив агакьна, идакай 675 гектар бегьердал атанвай, 402 гектар жегьил уьзуьмлухар я. Санлай къачурла, уьзуьмлухрин гьал пис туш, «Зардиян», «Карчаг», «Гюльгери-вацI» ООО-рин, «Заря» СПК-дин, «Цуьквер» КФХ-дин уьзуьмлухар иллаки хъсан гьалда ава.
Алай йисуз районда ципицIрин тарифдин бегьерни битмишарна. Виликамаз кьунвай гьисабралди районда 5947,4 тонн ципицIар кIватI хъувуна. Ида гьар са гектардай 88 центнер ципицIар кIватI хъувун тешкилзава. Санлай къачурла, алай йисуз 6000 тонндилай тIимил тушиз ципицIар кIватI хъувун (гектардай 90 центнер) гуьзлемишзава.
М.М.Бабаев районда зулун магьсулрин тумар чилик кутун патал цанар цунин кIвалахар кьиле физвай гьалдални гегьеншдиз акъвазна. Ада къейд авурвал, алай йисуз районда 1984 гектардай техилар кIватI хъувуна, гектардин бегьерлувили 23 центнер тешкилна. Гад агудунал 12 комбайн желбна.
Алай вахтунда магьсулдарри къведай йисан бегьердин бине кутун патал никIера ва чIурухъанра цанар цазва. Санлай къачурла, цIи 1600 гектарда техилар цун планламишнава. 20-октябрдалди 1350 гектарда цанар цанва, и кIвалах давамни жезва. Кьилди къачуртIа, «Ашагастальский» ЗАО-да 200, Курхуьруьн зонада 220, «Юхаристальский» МУСП-да 180, «Горец» ООО-да 150, «Зардиян» ООО-да 100, «Герейхановское» СП-да 110, «Звезда Самура» ООО-да 75, «Шагь-Абузар» СПК-да 20, «Арсен» КФХ-да 25, «Дере» ООО-да 30, «Новый путь» СПК-да 20 гектарда цанар цанва.
Тумар цуниз гьазурвилер акунин карда магьсулдарвилел машгъул жезвай хуьруьн майишатдин карханайриз, лежбервилинни фермервилин майишатриз, арендаторриз «Кюре Агро» ООО-ди, чпихъ тракторар, маса техника авай «Зардиян» ООО-дин, «Простор» СПК-дин, «Ашагастальский» ЗАО-дин, Сийидрин хуьряй тир механизаторри екез куьмекар гузва.
Хуьруьн майишатдин саки вири карханаяр, лежбервилинни фермервилин майишатар цадай тумаралди таъмин я, «Зардиян» ООО-дихъ ва «Кюре» ПО-дихъ гьакIни 60 тонн тумунин техил ава. Карханайра тумар цунив эгечIнава.
Вири карханайри, лежбервилинни фермервилин майишатри, арендаторри зулун магьсулрин тумар вахтунда цана акьалтIарун лазим я.
Совещанидал алай месэладай гьакIни «Хуьруьн майишатдин ва суьрсетдин управление» муниципальный казенный карханадин руководителдин заместитель Гьамидин Абдулкъафаров, Курхуьрелай тир арендатор Велимет Саругъланов, «Нарим» КФХ-дин руководитель Нарим Саругъланов ва маса юлдашар рахана.
И месэладай нетижаяр кьун яз рахай муниципальный райондин администрациядин Кьил Штибег Гьажимегьамедович Мегьамедханова къейд авурвал, хуьруьн майишатдин карханайри, лежбервилинни фермервилин майишатри чиликай тамамвилелди менфят къачун лазим я. Гьелелиг и кардал разивал ийиз жедач. Мадни, чпихъ гегьенш майданар-чилер аватIани, гзаф карханайри, КФХ-ри чилин налог, арендадин пул гузвач. И рекьяй Ш.Гь.Мегьамедханова талукь къуллугърин, карханайринни майишатрин руководителар таъкимарна, налогар вахтунда кIватIунин патахъай абурун вилик тайин везифаяр эцигна.
Совещанидал алай асул месэла гьялна куьтягьайдалай гуьгъуьниз анал мукьвара регьметдиз фейи «сельсовет Алкадарский» хуьруьн поселенидин кьил Азим Акимович Алимов, совещанидин иштиракчияр кIвачел къарагъна са декьикьада кисна акъвазуналди, рикIел хкана.
Эхирдай шад вакъиани хьана. Муниципальный райондин администрациядин Кьил Штибег Гьажимегьамедович Мегьамедханова райондин культурадин ва информациядин управленидин начальник Майрудин Бабахановаз 55 йис тамам хьун мубаракна ва адав «Сулейман-Стальский район» муниципальный райондин Кьил Нариман Шамсудинович Абдулмуталибован къул алай грамота вахкана.
Хазран Кьасумов