Цмуррин хуьруьз гьахълудаказ кьегьал рухвайринни баркаллу рушарин макан лугьузва. Хуьряй район, Лезгистан яргъарани машгьур авур шаирарни писателар, генераларни алимар, чIехи дережадин руководителарни хъсан пешекарар гзаф акъатна.
Цмуррин хуьр мукьвал тир гележегдин йисара тIвар-ван авай боксеррини машгьурда. Ихьтин фикирдал зун хуьруьн генерал-майор, профессор Мегьамед-Гьанифа Гьажибалаевич Шайдаеван тIварунихъ галай кIелунинни спортдин Центрадин дараматда къекъведайла цларал алай жегьил спортсменрин шикилар акурла атана. Гьар са шикилдин кIанихъай спортсмендин тIвар ва акъужунра къазанмишнавай агалкьунар къалурнава. Аквазва хьи, жегьил гадайрини рушари районда ва адалай къеце тухузвай чемпионатра, спартакиадайра, турнирра боксдай, кьезил атлетикадай, волейболдай хъсан нетижаяр къалурзава. Иллаки еке агалкьунар хуьруьн боксеррихъ ава.
Чун боксдин филиалдин тренер, спортдин мастервиле кандидат Шамил Алибеговахъ галаз гуьруьшмиш хьана.
-Чи хуьре Герейхановский ДЮСШ-ди филиал 2008-йисуз ачухна,-лугьузва Ш.Алибегова.-Хуьре кIелунинни спортдин Центр ачухуникди чаз кIвалахдай къулай шартIарни хьана. Идан нетижа яз чи филиал неинки районда, гьакI Кьиблепатан Дагъустанда хъсан боксерар гьазурзавай центрадиз элкъвезва. Алай вахтунда зи гъилик 32 жаванди спортдин и жуьредай вердишвилер къачузва ва чпин устадвал хкажзава.
Тренерди, вичин гафар тестикьарун яз, чаз кьилди-кьилди жаван боксеррикай, абурун агалкьунрикай суьгьбетна. Сифтени-сифте ада чун Мурад Абумуслимовахъ галаз танишарна.
- Хъсан гележег авай, боксдал рикI алай гада я, - лугьузва Ш. Алибегова. -Ам пуд сеферда Дагъустан Республикадин кIвен-кIвечивал патал тухвай акъажунрин чемпион, Кеферпатан Кавказдин Федеральный округдин чемпионатдин призер, Анапа шегьерда Россиядин кIвенкIве-чивал патал тухвай акъажунрин иштиракчи я. Пуд йис я ам республикадин жаванрин хкянавай командадин составда аваз. Гьа командадин тренеррини Мурадак еке умудар кутазва.
Тренерди чаз агалкьунар къазанмишнавай жаван маса боксеррин тIварарни кьуна: Дагъустан Республикадин кIвенкIве-чивал патал тухвай акъажунрин гъалибчи Абдулвагьаб Абдулвагьабов, и акъажунрин призерар Мегьамед Мегьамедов, Мегьамедшафи Мирзоев, Дагъустан Республикадин Кубокдин сагьиб Мирзабег Шагьламазов, Вирироссиядин акъажунрин чемпионар Гьажи Мегьамедов, Ильяс Къурбанов, са шумудра Кьиблепатан Дагъустандин чемпион Къурбан Нуралиев ва масабур.
Аквазвайвал, Цмуррин жаван боксерри спортда виликди умудлу камар къачузва. Ида чак, райондин агьалийрик, шадвал ва дамах кутазва.
Хазран Кьасумов