- Хуьре Игит дидеяр шумуд ава? - и суал гайила, «село Эминхюр» поселенидин кьил Рамазан Рамазанова заз куьрелди жаваб гана: «Веледар хана, хвена, чIехи авур вири дидеяр игитар я. Эгер хуьре 10 ва адалай гзаф аялар хайи дидейрин кьадар чир хьана кIанзаватIа, абур 9 ава». Алава яз, чешнелу, гзаф аялар авай, гьуьрметлу хзанрикай яз Р.Рамазанова чаз Магьмудов Алаудинан ва Сиясатан хзандин тIвар кьуна.
Чун Магьмудоврин хзандиз мугьман хьана. Лугьудайвал, ам вири уьмуьрда чилел зегьмет чIугур, гъилералди къазанмишай гьалалдин фу тIуьр ва незвай хзан я.
Алаудин ва Сиясат Магьмудоври виликдай Кьеанрин колхозда чуьлдин бригадада, 1977-йисалай 1990-йисалди «Аламишинский» совхозда 3-нумрадин уьзуьмчивилин бригадада гьакъисагъвилелди кIвалахна.
1980-1985-йисара Магьмудоврин хзанди 7 гектар уьзуьмлухар арендада кьуна. И йисара анрай 160-173 тонн ципицIар кIватI хъувуна.
Чна винидихъ лагьайвал, Сиясат ва Алаудин Магьмудоври 10 аял хана, хвена, низам-ахлакь авайбур, чIехид-гъвечIид чидайбур яз чIехи авуна. Абурун веледрикай Магьмудани Сиражидина Сургут шегьерда нафтIадин мяденра, амайбуру хуьре производствода кIвалахзава.
Веледри хьиз, 25-далай виниз хтулрини чIехи дидедизни бубадиз рикIин шадвал, руьгьдин кIубанвал гузва.
- Амаласалигь веледар хьун гьар са диде-бубадин бахтлувал я,-лугьузва Игит диде Сиясат Магьмудовади.-Аллагьдиз шукур, чи веледар, сусар, хтуларни зегьметдал рикI алайбур, чIалаз килигдайбур, ахлакь авайбур хьана.
Х. Гьажибалаев.