Гъалибвал. Килиг садра гьа и са гафунихъ гьикьван жанлу къуват, везинлувал, руьгь хкаждай гьиссер, тагьсир аватIа?! Гъалибвилер кIандатIа женгера, илимда, я тахьайтIа спортда хьурай - шад жедай кар я. Ингье, чна Ватандин чIехи дяведа ЧIехи Гъалибвал къачурдалай инихъ 66 йис тамам хьун къейдзава. Суварин вилик квай йикъара чав мад са шад хабар агакьна: мукьвара Уфа шегьерда боксдай кьиле фейи Россиядин чемпионатда чи районэгьли, спортдин лайихлу мастер Альберт Селимова 60 килограммдин заланвиляй инанмишвилелди 1-чка кьуна ва нубатдин сеферда Россиядин чемпионвилин тIвар къачуна.
Сайтдай къачур делилрай аквазвайвал, А. Селимова финалдиз экъечIунин рекье къуватлу са шумуд боксердин винел гъалибвал къачуна. Финалда ам Москвадин областдин патай экъечIзавай тIвар-ван авай боксер Ильдар Вагановахъ галаз гуьруьшмиш хьана. И женгинихъ кьетIен метлеб авай, гьикI лагьайтIа, алатай йисуз кьиле фейи Россиядин чемпионатда Альберт финалда Ильдараз кумукьнай. КьатIуз хьун четин туш - чи районэгьли кьегьал хцихъ кьисас вахчунин къаст авай. Гуьруьшдин сифте декьикьайрилай А. Селимова къаршидиз экъечIнавай боксердиз вичин гъутарин гьунар къалурна. Идан гьакъиндай ам 10:2 баллрин гьисабдалди гъалиб хьуни шагьидвал ийизва.
Гьа икI, А. Селимова вич 60 килограммдин заланвиляй Россияда 1-номердин боксер тирди тестикьар хъувуна. И чемпионат 2012-йисуз Лондон шегьерда кьиле фидай Олимпиададин къугъунрин вилик тухвай чIехи акъажунрикай сад тирди фикирда кьуртIа, Альбертахъ къведай йисуз кьвед лагьай сеферда яз Олимпиадайра иштиракдай лап хъсан мумкинвилер ава. ИкI тирдахъ Россиядин хкянавай командадин кьилин тренерни инанмиш я.
Лагьана кIанда: Альберт Селимов са шумудра Россиядин, Европадин, дуьньядин чемпион, 2008-йисуз Пекинда кьиле фейи Олимпиададин къугъунрин иштиракчи, международный ва Вирироссиядин гзаф кьадар чемпионатринни турниррин гъалибчи я.
- Майдин вацра Россиядин чемпионатда къачур гъалибвал за ЧIехи Гъалибвилин 66 йисан юбилейдиз бахшзава, - лагьана Уфада журналистриз гайи интервьюда А. Селимова.
Гила А. Селимова июндин вацра Турциядин Анкара шегьерда кьиле фидай Европадин чемпионатда иштиракда.
Россиядин нубатдин чемпионвилин тIвар мубарак авуналди, чаз Альбертахъ Европадин чемпионатдани агалкьунар хьана кIанзава.