Чи Ватан патал 9-майдин югъ гьамиша пакди яз амукьда ва инсанар гуьзердай мад элкъвез 1945-йисан Майдал хкведа. Гатфарин а йикъара гзаф кьиникьрихъ галаз алакъалу тир яргъал рехъ акьалтIна. Чи инсанвилин буржи адакай ибарат я хьи, чна-чаз сувар мубарак ийидайла, чна гьамиша къе чи арада амачирбур, дяведа телеф хьайибур рикIел хкана кIанда.
Чи халкьди фашистрин чапхунчийрихъ галаз кьиле тухвай и вагьши, зулумкар чIехи дяведин шагьидар хьайибурни яваш-яваш чи арадай акъатзава. Шаир Майрудин Бабаханова лагьайвал, къе чи арада амай дяведин ветеранри – чи уьлкведин тарихда хьайи важиблу вакъиадин шагьидри уьмуьрдин гьар са югъ душмандив гвай эхиримжи тепе хьиз къачузва.
Гьавиляй архивдин документрин ва шикилрин къиметлувал мадни артух жезва. И кар себеб яз абур асирралди чи рикIел аламукьзава.
Шикилда: дяведин иштиракчияр тир (чапла патахъай эрчIи патахъ) Ханбалаев Играмудин, Къазимегьамедов Гьажимегьамед, Кьасумов Тажидин, Шамхалов Нажмудин, Тагъиев Паша, Гьажиагьмедов Мегьамед, Мейланов Рауф, Гьабибов Оруж, Тагьиров Эседуллагь 9-майдин суварин трибунада (1985-йис).