Абидин Камилов
Лезги чилин багьа къаш
ЦIуьтхвей гъед хьиз вун уьмуьрдай акъатна,
ЧIулав телди Шалбуз дагълар къарсурнай.
Зи халкь патал вуна чIугур зегьметрай,
Лагь, кьисметди ваз ажал гьикI гьазурнай?!
Чи халкь патал вун, шаксуз, чаз урусрин
Гьам Пушкинни Маяковский хьанай вун.
Къадир чидай лезги эдеб-намусдин,
Экуь гъетрен нур кьилеллаз ханай вун.
Пехилвилер, фитнед селлер кьулухъ таз,
Михьи Ричал вацI хьиз, физвай виликди,
Ни бейхабар кьулухъай рум ганай ваз?
Ни вегьенай, де лагь, кварквацI кIвачик ви?
Къанни вад /йи/сан яшда аваз, жаван яз,
Вун мензилдиз фенай садни физ тахьай.
Чун, невеяр, ама даим буржлу яз,
Вун «туьхвейла» гьич ви сурни хуьз тахьай
«Кьейила» гаф зи меняй гьич акъатдач
Чун патал вун туьхуьн тийир са рагъ я.
И гафар за тикрарналди гъалатIдач,
Алибег, вун мидаим я, вун сагъ я!
Барзадин чуьл, на яд хъвайи Ричал вацI,
Гьа вилик хьиз, вун вилив хуьз, амазма.
Алибег, вун авачтIан чи арада,
Ви руьгь сагъ я ви шиирра, авазра...
Агь, Алибег-лезги чилин багьа къаш,
Куьз ви нурар, лагь, икьван фад туьхвенай?
Игитвилиз гьич манийвал жедач яш,
Лезги халкьдин тарихда тIвар кхьенвай,
Вун женгчи яз амукьда чи рикIера,
Вун чешне яз, чна ви кар давамда.
Цуьквер цада вун къекъвей гьар рекьера.
Гьикьван вун чаз бес жезвач и макъамда?!
Хайи хуьруьн сурара, ви тIвар алаз,
Сур ава ваз ви гьуьрметдай, лишан яз,
Квез герек я лишандин сур инсандиз.
Вич элкъвенвай игитвилин лишандиз?!
Дашдемир Адилов
Шииратдин нурлу гъед
Алибег, вун нурлу гъед хьиз куькIвена,
Хайи чилиз ишигъ гана элкъвена.
Маяковскийди хьиз кхьей шиирар,
Алмасдилай хци тир ви фикирар.
Гъизвай чIавуз Ватанди сифте цуьквер,
Зарачийрик руьгь хутунай на иер.
Яратмишунрив гуз туна на лепе.
Ви Ватандин дарискъал тир гьар пипIе.
Эминалай, Сулейманалай чешне
Къачуз, шииратдин пайдах кьур вине,
Ви шииррихъ метлеб ава лап дерин,
Сирнавзавай дегьнейра чи рикIерин...
Багьа тир ваз хайи Ватан, хайи чил,
Умуд кваз, вал алай вири халкьдин вил.
Кьисмет-бахтсуз, хьайи чIавуз вун къуьгъуьл,
Жагъанач ваз са кас кьванни кьадай гъил.
Сажидин
Ам ятIа чи Алибег
Гъетер ава, чеб амачиз куькIуьнна,
Агакьариз кIанзавай чал чпин экв.
ЦIийи уьмуьр кIанз гьатайди женгина,
Ам ятIа чи Фатагьан хва Алибег!?
Жегьил уьмуьр бахшна лезги эл патал,
Мавгьуматдин хуруз фейи шаир тек;
Чан гайи кас цIийивилин гел патал,
Ам ятIа чи Фатагьан хва Алибег!?
Панагь хьана кесиб халкьдин Ризайрин,
Зулуматдик тахьун патал мад гьелек;
Зарул авур кас буьгьтенчи арзайрин,
Ам ятIа чи Фатагьан хва Алибег!?
Девирар къвез алатна виш йисарни,
Ам кумазма чи мехъеррик, чи мелек.
Экуьвилихъ физ гайи кас тарсарни,
Ам ятIа чи Фатагьан хва Алибег!?
Къе Цмурдал сувар ава виш йисан,
Хайи халкьдиз тамашзава ам зирек.
Гьуьрметлу тир инсанрикай са инсан,
Ам ятIа чи Фатагьан хва Алибег!?
Гъетер ава, чеб амачиз куькIуьнна,
Агакьариз кIанзавай чал чпин экв.
ЦIийи уьмуьр кIанз гьатайди женгина,
Ам ятIа чи Фатагьан хва Алибег!?
Жарият Мегьамедова
Алибег Фатаховаз
Дадмишнай на дад пачагьдин девирдин,
Инкъилабдин галукьнай вахъ ялавар
ЦIийи рекьиз ашкъидалди жавандин
Инанмиш яз вегьенай мягькем камар.
Лап куьруьди хьана уьмуьр, кьисмет я,
Агакьна вун къазанмишиз гьуьрметар,
Фагьум дерин акьулдалди кьатIанвай,
Метлеблубур я вуна тур девлетар.
КIелзава за ви эсерар цIарба - цIар-
Гьевеслубур, вафалубур ватандиз,
Дугъриданни герек я жал азабар,
Ахьтин чIалар гъун паталди арадиз?
Кузва ви рикI хайи чилихъ, инсанрихъ
Багъишнавай илгъамдин пай цавари,
Къанни вад йис гекъиг жедач вишерихъ,
Экв гузва чаз ви чирагъдин нурари.
КIандай захъни ви илгьамдин са цIелхем,
ЧукIурдайвал дуьньядиз зи кIанивал
Ашукь я зун вал хьиз вири шаиррал,
Алакьзавай гьейранариз шииррал.