Диде! Ам инсаниятдин сихил, несил давамарзавай бинейрин бине, гьар са велед патал рагъни варз, нурни чим, берекатни бахт, умудни панагь, уьмуьрни гележег я. Диде датIана гьар са веледдин рикIе, бейнида ава. ИкI туширтIа, лап четин макъамда мецел «диде» гаф къведачир.
Дидедин, дидевилин дережа фикирда кьуна, РФ-дин Госдумадин дишегьлийрин ва жегьилрин крарин рекьяй Комитетди Россияда Дидейрин югъ тайинарунин ва ам сувар хьиз кьиле тухунин теклифни ганай. 1998-йисан 30-январдиз Россиядин Федерациядин Президентдин Указдалди ноябрдин вацран ял ядай (гьяд) эхиримжи югъ Россиядин дидейрин Югъ яз малумарна. Анлай инихъ ам сувар хьиз кьиле тухузва. Алай йисуз ам 28-ноябрдал гьалтнава.
Россиядин дидейрин йикъан вилик квай йикъара зун Кьасумхуьрелай тир мегьрибан дишегьли, зегьметдин ветеран, 6 веледдин диде ва са шумуд хтулдин чIехи диде Меликова Зейтуна Бабаевнадихъ галаз гуьруьшмиш хьана.
Яшлу, чина берекатдин нур авай и дишегьлиди зун хушвилелди кьабулна. Суфрадихъ ацукьна, атирлу чай хъваз, ада заз вичин уьмуьрдикай, зегьметдин рекьикай, хзандикай ихтилатарни авуна.
- Зи ери-бине, чан хва, Агъа Арагърин хуьряй я, ана зун 1932-йисан ноябрдин вацра лежбер Бубадин хзанда дидедиз хьана, - суьгьбетзава Зейтуна дидеди. – Зи уьмуьр, кьисметни гьа йисарин амай аялрин, жаванрин кьисмет хьтинди хьана: дарвилерни акуна, четинвилерни ацалтна, жегьил руш яз, хуьруьн колхозда гвенарни гена, мал-къарадихъни гелкъвена. И четинвилерихъ галаз регьят, лугьудайвал, рагъ хъуьрей йикъарни хьана, рикI шадар авур крар-вакъиаярни. Ингье, яшарни атана 78 йисалай алатнава, къе закай чIехи хзандин иеси, веледринни хтулрин диде хьанва. ГьакI хьайила, чан хва, захъ Худади гайи йикъал разивал тийидай себебар авач.
З. Меликовади колхозда, совхозда, гуьгъуьнилай Кьасумхуьруьн консервиярдай заводда яргъал йисара намуслудаказ зегьмет чIугуна. Идан гьакъиндай адаз «Соцсоревнованида гъалиб хьайиди», «Пятилеткадин зарбачи» знакар, «Зегьметдин ветеран» медаль гуни ачухдиз шагьидвал ийизва.
Зейтуна Бабаевнади вичин кьадар-кьисмет 45 йисуз муаллимвиле кIвалах авур рагьметлу Митгьядахъ галаз сад авунални разивал, шадвал ийизва.
... Гьелбетда, яшари вичин кар ийизва. Зейтуна дидедизни чи суалриз жавабар гун, рахун четин акъваззавайди за кьатIана, гьавиляй чи суьгьбетни куьруьди хьана.
- Гила, хва, за гьар юкъуз Аллагь-Таладихъ элкъвена дуьнья ислягь, вирибурун, гьабурухъ галаз жуван веледарни бахтлу хьурай лугьуз ялварзава, - лагьана эхирдай З. Меликовади. – Им вири дидейрин мурад я.
Дидедин рикI – ам гьамиша, вири уьмуьрда веледрихъ кузва. Веледдин бахт патал рикIни акъудна къурбанд ийиз гьазур я дидеяр.
Сувар мубаракрай, Зейтуна диде ва амай вири дидеяр! Сагъвал, шадвал гурай квез!