Малум тирвал, алай йисуз вичиз тIебиатдин патай еке бажарагъ ганвай, вичин уьмуьрди ва яратмишунри цуьк акъудзавайла, 25 йисан яшда аваз, цуьтхвей гъед хьиз, садлагьана чи арадай акъатай Дагъустандин Советрин литературадин бине эцигайбурукай сад тир чIехи шаир ва ватанперес Фатахов Алибег Абдулфетягьович дидеди хайидалай инихъ 100 йис тамам жезва. Вичиз гайи куьруь са уьмуьрда вичелай гуьгъуьниз яратмишунрин девлетлу ирс тунвай адан эсерар хайи халкьдиз гзаф хуш ва адан тIвар сейли я. Адан гзаф эсерар урус ва Дагъустандин маса халкьарин чIалариз таржума авунва, абур школайрин учебникра ва хрестоматийра гьатнава.
Гьа са вахтунда хъсан шаир, прозаик, публицист, фольклорист ва таржумачи тир адан гзаф эсерар гилани хайи халкьдал агакьнавач. Вич регьметдиз фейидалай инихъ алатнавайди 75 йис ятIани къени шаир Махачкъалада кучуднавай сур малум туш. Адан шаирвилин бажарагъдиз, лезги ва гьакIни Дагъустандин литература вилик тухунин карда адан лайихлувилериз гилани лазим къимет гуз хьанвач.
Вири и терефар фикирдиз къачуна, шаирдин 100 йис тамам жезвай алай йисуз «Сулейман-Стальский район» муниципальный райондин адми-нистрацияди Дагъустандин советрин литературадин бине эцигайбурукай сад тир Алибег Фатахован 100 йисан юбилей лайихлу-даказ къейд авунин жигьетдай алай йисан 14-сентябр-диз махсус къарар акъуднава.
Анал тести-кьарай и жигьетдай гьазурнавай план-дин бинедаллаз районда са жерге серенжемар гьеле кьиле тухванва: чкадин газетда чIехи шаирдин уьмуьрдиз ва ярат-мишунриз талу-кьарна хейлин макъалаяр чап авуна, КТВ-ди передачаяр тешкилна.
Муниципальный райондин такьатрин гьисабдай шаирдин гуьмбет гьазурна, хкана, Цмуррин хуьруьн юкьвал хкажнава. Ам и хуьре и йикъара шаирдин 100 йисан юбилейдин мярекат кьиле фидайла шад гьалара ачухда. Идахъ галаз сад хьиз, райондин такьатрин гьисабдай и йикъара шаирдин хкягъай эсерар ва адаз вичиз, адан яратмишунриз талукь маса макъалаяр аваз, гуьрчегдаказ туькIуьрнавай яцIу (452 чин) ктабни чапдай акъуднава.