25-октябрдиз «Сулейман-Стальский район» муниципальный райондин администрациядин нубатдин заседание хьана. Адан кIвалахда муниципальный райондин Кьилин везифаяр тамамарзавайди тир Штибег Гьажимегьамедович Мегьамедханова, администрациядин Кьилин везифаяр тамамарзавайди тир Мусаиб Гьажибалаевич Агьмедова, администрациядин управленийрин, отделрин начальникри, хуьрерин поселенийрин кьилери, школайрин директорри, организацийрин ва идарайрин руководителри иштиракна.
Заседание, анал алай месэлайрикай лугьуналди, Ш. Гь. Мегьамедханова ачухна ва кьиле тухвана.
Анал агъадихъ галай месэлайриз килигна:
1. Райондин яшайишдинни-коммунальный майишатар 2010-2011-йисарин хъуьтIуьн сезондиз гьазур хьанвай гьалдин гьакъиндай.
2. Чкадин бюджетдиз налогрин ва налогрилай къецяй тир къазанжияр къвезвай гьалдин гьакъиндай.
3. Жуьреба-жуьре месэлаяр.
Заседанидал алай сад лагьай месэладай анал администрациядин капитальный эцигунрин ва ЖКХ-дин управленидин начальникдин заместитель Мустафаев Мустафа Абузаровича информация авуна. Ада къейд авурвал, муниципальный райондин администрацияди ЖКХ-дин объектар 2010-2011-йисарин хъуьтIуьн сезондин вахтунда кIвалах авуниз гьазурунин рекьерай тайин кIвалах тухванва. Алай йисан 25-майдиз 151-нумрадик кваз кьабулай администрациядин къарардин бинедаллаз пулунин такьатар ахъайна. Агьалияр ва идараяр патал 546 кубический метр кIарасар, 80 тонн къванцин цIивин гьазурна. Курхуьруьн 1-нумрадин СОШ-да чими ийидай система, Вини СтIалрин ясли-бахчада газдин пичер дегишарна, цIийи электронасосар эцигна, Чуьхверхуьруьн СОШ-да газдин форсункаяр, Герейхановский 1-нумрадин СОШ-да котельнидин дарамат ремонт хъувуна.
«Дагэнергодин» рекьяй хъуьтIуьн сезондиз гьазур хьуни 90 процент тешкилзава. Санлай къачурла, 17,9 километрдин яргъивал авай электропередачайрин линияр ремонт хъувунин ва трансформаторар эцигунин рекьерай Кьасумхуьрел, Салияндал ва Агъа СтIалдални хейлин кIвалахар кьиле тухванва.
Агьалийриз къуллугъ авунин кIвалах хъсанарунин, хъуьтIуьн вахтара бес кьадар чимивал хуьнин мураддалди ДаркIуш къазмайрин, ЦIийи Макьарин, Эминхуьруьн, Агъа СтIалрин ва Шихидхуьруьн амбулаторийра ва участковый больницайрани кIвалахар тухвана.
Авунвай кIвалахрикай лугьунихъ галаз санал, М. А. Мустафаев вичин рахунра хъуьтIуьн шартIара кIвалах авунин рекьерай амай кимивилерал, хъувуна кIанзавай кIвалахрални гегьеншдиз акъвазна, абур арадай акъудун патал тади серенжемар кьабулун лазим тирди къейдна.
И месэладай заседанидал талукь къарар кьабулна.
Заседанидал алай кьвед лагьай «Чкадин бюджетдиз налогрин ва налогрилай къецяй тир къазанжияр къвезвай гьалдин гьакъиндай» месэладай райондин администрациядин экономикадин управленидин начальникдин заместитель Вагьабова Саният Абдулгьамидовнади информация авуна.
И месэладай анал Россиядин ФНС-дин ДР-да авай 2-нумрадин МРИ-дин руководитель Гьасанов Марат Сабировича алава информация авуна.
Абур чкадин бюджетдиз налогрин ва налогрилай къецяй тир къазанжияр къвезвай гьалдал, и рекьяй рехъ гузвай кимивилерал ва къазанжияр кIватIун патал вилик акъвазнавай везифайрал гегьеншдиз акъвазна.
И месэладай анал РФ-дин Пенсионный фондунин Дагъустандин чи райондин отделенидин начальник Къачаев Магид Абдуселимович, РУО-дин начальник Асланов Жабраил Агъамирзоевич ва маса юлдашар рахана.
И месэладайни анал талукь къарар кьабулна.
Штибег Гьажимегьамедович Мегьамедханова заседанидал алай месэлайрин важиблувал мад сеферда къейдна, и рекьерай гьял тавунвай месэлаяр, кимивилер амайдакай лагьана, кIвалах хъсанардай меслятар къалурна.
Заседанидал районда Вирироссиядин агьалийрин перепись кьиле фейи гьалдикай «Дагестанстатдин» чи районда авай векил Къухмазов Рамазан Зейдуллагьовича, газетарни журналар подписка авунин кампания башламиш хьанвайдакай «Куьредин хабарар» газетдин редактор Миметов Анварбег Асланбеговича информацияр авуна.
Заседанидал маса месэлайризни килигна.