Чи район муаллимралди, муаллимрин хзанралди иллаки девлетлу я. Ихьтинбурукай сад Вини СтIалдал яшамиш жезвай Баламирзоев Жабиран хзан я. Ада вичи 1980-йисуз ДГУ-да биологиядин факультет акьалтIарна, направленидалди пуд йисуз Чечняда, гуьгъуьнилай Цмуррин хуьруьн юкьван школада пуд йисуз директорвиле кIвалахна, анайни Вини СтIалрин юкьван школадиз хтана, 2008-йисалди гьа и школада директорвал авуна. Алай вахтунда ам пенсияда ава. Адан уьмуьрдин юлдаш Баламирзоева Тамамата ДГУ-да филологиядин факультет куьтягьна. Ам Вини СтIалрин юкьван школада лезги чIалан тарсар гуз 36-йисан тежриба авай муаллим я.
Тежрибаллу муаллим хьиз, Тамамат бахтлу хзандин дидени я. Адахъ кьве рушни кьве гада ава. Рушарини, дидедилай чешне къачуна, кьведани ДГУ акьалтIарна, чпин дидедихъ галаз Вини СтIалрин школада лезги чIалан тарсар гузва. Абуруз вири аялрин, абурун диде-бубайрин патай еке гьуьрмет ава. Заз жуван патай абуруз ва гьакIни вири муаллимриз алукьзавай муаллимрин Югъ мубаракиз ва и гъвечIи макъала ихьтин шиирдин цIараралди акьалтIариз кIанзава.
Рахадай жуван диде хайи
Гьамгад яд хьиз, гьакьван михьи,
Тарсар тухуз чIалал лезги
Алахъзавай куьн сагъ хьурай.