Эхиримжи йисара райондин руководстводи экономикадин, социальный, эцигунрин ва маса хилериз инвестицияр желбзава, район абад хьун, агьалийрин яшайишдинни дуланажагъдин шартIар хъсанарун патал еке кIвалах тухузва. Гьа са вахтунда, районда гъвечIи ва юкьван карчивал вилик тухуниз рекьер ачухнава, и кардиз вири патарихъай куьмекар гузва. Райондин хуьрера жуьреба-жуьре цехар ачухуни идан патахъай шагьидвал ийизва.
ГъвечIи ва юкьван карчивал менфятлу тирди тестикьарзавай кьве мисал чна агъадихъ гузва.
Дагъустандин халкьдин шаир СтIал Сулейманан ватан тир АгъастIалдал эхиримжи вахтара минеральный ятар акъуддай, кIвачин къапар цвадай, куьгьне хьанвай диванар ремонт хъийидай, пластикадин ракIарарни дакIарар гьазурдай, шлакоблокар акъуддай цехар кардик акатнава. Абуру агьалийрин игьтияжар таъминарзава. Хуьре командировкада авайла зун пластикадин ракIарарни дакIарар гьазурзавай цехдин кIвалахдихъ галаз мукьувай таниш хьана. И кардихъ вичин себебни авай: хуьруьнвияр тир Р.Абалаева, В.Сефикъулиева, А. Мегьамедова заз и цехдин кIвалахдикай, иллаки ам ачухнавай Бедевов Рагьманакай (икьван чIавалди заз ам таниш тушир) гзаф хуш келимаяр лагьана.
Чун СтIал Сулейманан музейдин къаншарда авай цехдиз фена. Малум хьайивал, ам 2004- йисалай кардик ква. Цехда 5 касди кIвалахзава.Р.Бедевов, жегьил итим ятIани, кIвалах хъсандиз чизвай пешекар я. Адахъ галаз кIвалахзавай амай устIаррикайни икI лугьузва.
- Тариф авун туш, стха,- лугьузва Р.Бедевова.- Чи цехда гьазурзавай пластикадин ракIаррихъни дакIаррихъ муьштерийрин патай еке игьтияж ава. Чаз заказар неинки чи райондин хуьрерай, гьакIни маса чкайрайни къвезва. Чун абурун ихтибар квадар тавун патал алахъзава, устIарри гьазурзавай ракIарринни дакIаррин еридиз кьилин фикир гузва.
Чаз мадни са кар малум хьана. Хъсан устIар- пешекар хьиз, Р.Бедевов гъил ачух, мерд инсанни я. Ада мергьеметлувилин гзаф кIвалахрикни вичин пай кутазва. ИкI, 14 агъзур манат пул гана, ада хуьруьн са куьчедиз херхем вегьена, рекьер, кимер, сурар къайдадиз хкидайла, спортдин майдан туькIуьрдайла, спортдин турнирар тухудайла са шумудра вичин патай пул гана. Идалайни гъейри, ада хуьруьн школада хъсан къиметар аваз кIелзавай аяларни ашкъиламишзава, абуруз 1000, 1500 манат пул гузва.
- Инсан патал дуьньядал виридалайни чIехи девлет сагъламвал я,- лугьузва Р. Бедевова. -Мергье-метлувилин кIвалахар авурла, агакь тийизвай касдиз куьмекдин гъил яргъи авурла Аллагьни рази жеда.
Чазни лугьуз кIанзава: къуй вахъ чандин сагъвал, хзандин бахтлувал, гъилин ачухвал ва халкь патал ийизвай кIвалахдани агалкьунар хьурай, гьуьрметлу Рагьман стха!