КIварчагърин хуьруьн школа районда еке тарих авай ва акьалтзавай несилдиз чирвилерни тербия гунин карда агалкьунар жезвай школайрикай сад я. Ина школади вичин кIвалах 1931-йисуз башламишна. Гьелбетда, четинвилерни тахьана амукьнач. ИкI, школа патал махсус дарамат авачир, ктабрин, герек тадаракрин патахъай кьитвал авай. Мадни, тарсар гудай муаллимар бес жезвачир. Сифте вахтара тарсар инсанрин яшайишдин кIвалера, мисал яз, Ибрагьимов Агъабеган, Сефербегов Ибремпашадин кIвалера тухузвай.
1934-1935-йисара хуьре школа патал дарамат эцигна, анаг тадаракламишна. Агъсакъалри рикIел хкизвайвал, и кардик хуьруьн гзаф инсанри чпин пай кутуна. Школадин сифте директорвиле АгъастIалдилай тир Шихнабиев Абдукерима кIвалахна. 1940-1950-йисара школада чкадин муаллимар тир Юзбегов Мегьамеда, Абдулмежидов Абдулсена, Гьамидулаев Мугьудина, Алибалаева Зинаидади, Алибабаев Саржана кIвалахна. Хейлин йисара школада Билалов Алдера (АгъастIал), Акимов Къурбана (Миграгъ), Нуралиев Назира (Кьулан СтIал), Гьажалиев Зейналиди (Курхуьр) тарсар гана.
1956-1957-йисара хуьруьн жемят цIийи чкадал (гила алай чкадал) куьч хьана, хуьре школадин цIийи дарамат эцигна. Школа сифтедай 7 йисанди тир. 1962-йисуз 8 йисандаз ва 1974-йисуз юкьвандаз элкъуьрна.
Къейд авун лазим я хьи, 1967-йисалай инихъ школадин директорвиле Мегьамедов Мизамудин Юзбековича кIвалахзава. Ам РФ-дин умуми образованидин отличник я.
2002-йисан 16-октябрдилай Дагъустан Республикадин Госсоветдин 270-нумрадин Указдалди школадиз СССР-дин спортдин мастер, азаддиз кьуршахар кьунай Европадин чемпионатдин призер Къараханов Маидин Сейфуллаевичан тIвар гана.
Школа акьалтIарай гзафбурукай чIехи организацийрин руководителар, алимар, спортсменар, пешекарар хьанва. Ихьтинбурукай яз биологиядин илимрин доктор, академик А. М. Абасован, технический илимрин доктор, академик К. З. Къухмазован, хуьруьн майишатдин илимрин доктор, профессор Т. С. Алибалаевадин, илимрин кандидатар тир М. М. Къадималиеван, Р. Г. Абдурагьманован, Э. А. Абасовадин, Яракьлу Къуватрин подполковник А. И. Наврузован, медицинадин къуллугъдин подполковник М. Н. Гьасанован, МВД-дин полковник М. Р. Велиханован, азаддиз кьуршахар кьунай спортдин мастер П. К. Къазанфарован ва масабурун тIварар кьаз жеда.
Чаз инанмишвал ийиз кIанзава хьи, школадин коллективди вичин баркаллу крар, агалкьунар къазанмишун къенлай кьулухъни давамда.