Эхиримжи йисара райондин руководстводи спорт ва физкультура вилик фин патал еке кIвалах тухузва. Хуьрера ДЮСШ-яр, абурун филиалар, стадионар ачухуни, анра жаванриз спортдин жуьрейрал машгъул жедай къулай шартIар тешкилуни, районда неинки чкадин, гьакI республикадин метлеб авай турнирар тухуни, чIехи турнирра ва чемпионатра агалкьунар къазанмишай спортсменар кьабулуни и кардин гьакъиндай ачухдиз шагьидвал ийизва. ИкI фикир гузвайвиляй райондин гзаф спортсменри Дагъустан Республикадин, Федеральный округдин, Россиядин, Европадин чемпионатра, международный чIехи турнирра агалкьунарни къазанмишзава.
Уьлкведа, дуьньяда тIвар-ван акъатнавай чи районэгьли чемпионрин гелеваз цIудралди жегьил спортсменарни физва, абурулай чешне къачуз алахъзава. Абурукай сад Кьасумхуьрелай тир Пирмегьамедов Мегьамед я. Лагьана кIанда, ам жаван спортсмен я. 8-классдиз акъатнавай Мегьамеда райондин 1-нумрадин ДЮСШ-да тежрибалу тренер Надир Къурбанован гьилик рагъэкъечIдай патан женгинин са хел тир ушу-саньдадай вердишвилер къачузва ва устадвал хкажзава.
- Жегьил ятIани, Мегьамед спортдал рикI алай, четинвилерихъай кичIе тушир гада я, - лугьузва Н. Къурбанова. - Зун умудлу я, ам спортда чIехи дережайриз хкаж жеда.
Чаз малум хьайивал, М. Пирмегьамедовахъ спортда хъсан нетижаярни жезва. ИкI, ада Белижда, Губденда, Дербентда тухвай турнирра, жаванрин арада Къиблепатан Дагъустандин чемпионатда, Республикадин кIвенкIвечивал патал тухвай акъажунра 1-чкаяр кьуна.
Са тIимил вахт идалай вилик М. Пирмегьамедова 1996-1997-йисара дидедиз хьайи жаванрин арада Москвада кьиле фейи Вирироссиядин турнирда иштиракна. Вичихъ галаз бягьсиниз экъечIай 4 спортсмендин винелни Мегьамеда 60 килограммдин заланвиляй инанмишвилелди гъалибвал къачуна, 1-чка кьуна. Гьелбетда, сифте яз ихьтин чIехи турнирда иштиракна гъалибвал къачун - им еке агалкьун я. М. Пирмегьамедоваз медаль, РФ-дин образованидин ва илимдин министерстводин грамота, къиметлу пишкеш гана.
Къейд ийиз кIанзава: Мегьамедаз Москвадиз фидайла спонсорвал муниципальный райондин администрацияди ва 1-нумрадин ДЮСШ-ди авуна.
Вахъ спортда мадни чIехи агалкьунар хьурай, Мегьамед!