Чи газетдин алатай нумрада хабар гайивал, райондин хуьруьн майишатдин карханаяр, КФХ-яр, ЛПХ-яр, арендаторар чпихъ авай 1642 гектардин никIерай гад агудунал машгъул я. Райондин УСХ-дай чаз гайи делилралди, алай вахтунда эхиримжи гектаррай магьсулар кIватI хъийизва. Гад агудай никIерин гьар са гектардай, юкьван гьисабдалди 17,3 центнер техил хьанва. Им шазандилай 3,4 центнердин гзаф я.
Хъсан нетижаяр хьанвайбурукай яз «Даркуш» ОАО-дин (24 центнер), «Юхаристал» МУП-дин (21,3 центнер), «Надежда» ООО-дин (30 центнер), «Зардиян» ООО-дин (20 центнер), гьакIни юкьван гьисабдалди гьар са гектардай 25 центнер техил кIватI хъувур Эминхуьруьн ва ЦIийи Макьарин арендаторрин тIварар кьаз жеда.
Техилар кIватI хъувур никIерай пресподборщикар галай тракторри самар туьквера кьазва, абур хутахиз фермайрин патарив таяйра твазва.
Хъсан еридин техилар гьасилнавай майишатрин руководителрихъ галаз меслят авуналди, къведай йисан бегьер патал карханайра тумунин техил чара авуна саламатнава. ИкI, «Даркуш» ОАО-да 100 тонн, «Шагьабузар» СПК-да 30 тонн, «Зардиян» ООО-да 20 тонн техил ава.
Гьа са вахтунда, хейлин майишатри къведай йисан бегьер патал гад агудай никIера ва чIурухъан чкайра цанар цаз башламишнава. Ихьтинбурукай яз «Даркуш» ОАО-дин, «Асрет», «Марат» лежбервилинни фермервилин майишатрин тIварар кьаз жеда.
УСХ-дай чаз лагьайвал, къведай йис патал районда цIининдалай гзаф майданра техилар цада.