Мублагь КIварчагърин дередикай, анин хуьрерикай рахадайла, зи фикирдиз гьасятда гегьенш майданра экIя хьанвай уьзуьмлухар къведа. Гьакъикъатдани, ина уьзуьмчивилел машгъул жез гзаф йисар я. Эхиримжи йисара районда инвестиционный проектар кардик кутун себеб яз, КIварчагъ дередани инсанар хуьруьн майишатдин маса хилерални рикIивай машгъул жезва. Мисал яз, гзафбуру багълар кутунва. Ихьтин инсанар чал НуьцIуьгърин хуьрени гьалтна. Хуьре авай саки вири кIвалерихъ галай салан участокар багълариз элкъвенва. Хуьруьн мулкуна чилин участокар кьуна багълар кутунвайбурун кьадарни тIимил туш. Тельман Агъахановахъ галаз зун хуьруьн кIанихъ галай багъда таниш хьана.
- Зав, стха, 49 йисан вахтунда арендада къачунвай 2 гектар чил гва, - суьгьбетзава Тельмана. – ЦIи 5-йис я за ана хутун багъ кутуна. Квез аквазвайвал, тарарал хъсан бегьерни дигмиш жезва. Багъманчивал менфятлу хел я, гьавиляй захъ чил арендада къачуна, багъларин кьадар артухардай фикир ава.
Элкъвена сеткадалди кIевирнавай, жегьил тарар саки са буйдиз хкаж хьанвай, пунариз перер янавай, векьикай михьнавай, са гафуналди, иесивилелди гелкъуьн тешкилнавай багъ хъсан гьалда ава.
- Виликан йисара чаз, хуьруьн майишатда кIвалахзавайбуруз, иллаки цIийиз багъларни уьзуьмлухар кутазвайбуруз дигидай цин патахъай еке четинвилер авай, - давамарзава ихтилат Т. Агъаханова. – Идан нетижада кутур багълар кьурай, арендада къачур чилер вахкай дуьшуьшарни хьана. Алатай ва цIинин йисара дигидай яд булвилелди ава. Идай чна, чилел зегьмет чIугвазвайбуру, райондин руководстводиз чухсагъул лугьузва.
Чун НуьцIуьгърин хуьре багълар кутунвай маса арендаторрин участокрани хьана.
- Зун инанмиш тирвал, КIварчагъ дереда, уьзуьмчивал хьиз, гележегда багъманчивални вилик фида, - лагьана чахъ галаз дередин хуьрериз атанвай райондин хуьруьн майишатдин управленидин кьилин пешекар Ш. Гьажимурадова.
Эхиримжи 3-5 йисан къене ина кутунвай багълар, инсанрин къастар акурла, чунни инанмишвал ийидай фикирдал атана.